Björgunarskipið e/s Titanic

Þegar leki kom að m/s Þjóðarskútunni skiptist áhöfnin í tvö horn.

Hópur manna vill manna dælurnar, „ausa" skipið, halda vélunum gangandi og bjarga áhöfn og farmi með því að sigla fyrir eigin vélarafli í höfn. Þeir vitað að það er hægt, því mesti stormurinn er afstaðinn og sjólag batnandi.

Skipstjórinn og fylgismenn hans panikkuðu. Þeir eru úrræðalausir, treysta sér ekki til að ausa og vilja gefast upp. Senda út neyðarkall og fá stórt evrópskt skip til að bjarga áhöfninni og taka m/s Þjóðarskútuna í tog.

Á stóru evrópsku skipi er kapteinn Rehn við stýrið. Hann hefur boðið fram aðstoð.

Ítrekað.

„Kapteinn Rehn ætlar að bjarga okkur alveg gratís", lýgur skipstjórinn.

Sem stendur eru flestir úr áhöfninni á því að gefast upp á að bjarga sér með sæmd og fara um borð í e/s Titanic til að komast í örugga höfn. Meirihlutinn ræður.

 

61,2% vilja aðildarviðræður

A4

Hvað þarf mörg A4 blöð til að leggja niður Ísland?

Til að uppgjöfin líti betur út skal láta Alþingi fjalla um A4 blaðið fyrst. Það er efni í hressilegt málþóf sem gæti staðið yfir í margar vikur. Heimilin geta bara hinkrað á meðan. 

Gæti orðið stutt kjörtímabil

"Allt fyrir ekkert"

Með EES fengum við "allt fyrir ekkert", var okkur sagt.
Með ESB gefum við allt fyrir ekkert. Eða því sem næst.

Össur er "ánægður með stöðuna" en VG liðar segja ekkert. Það bendir sterklega til þess að uppgjöfin verði ofaná, í einhverri mynd.


Með inngöngu í Evrópusambandið gefum við frá okkur forræði yfir eigin velferð. Þá hverfur úr landi löggjafarvald í mörgum málaflokkum, sem og hin formlegu yfirráð yfir nýtingu auðlinda. Og þetta er ekki léttvægt, sama hvað ESB-sinnar segja. Gefum líka frá okkur frelsi til að halda áfram viðskiptum við lönd utan Evrópusambandsins á okkar forsendum.

Það sem við fáum í staðinn er ekkert.

Jú kannski evruna árið 2017. Við eigum að trúa því að hún verði til blessunar, en ekki þeirrar bölvunar sem Grikkir, Írar og fleiri íbúar í Evru-landi þurfa að horfast í augu við. Þeir búa við raunveruleikann en ekki glansmynd Samfylkingar eða finnska stækkunarstjórans.

Bændur fá heimskautastyrki til að standa af sér storminn og koma út á sléttu. Fiskveiðar eiga að standa óbreyttar, ef allt fer á besta veg. Tollar og markaðir breytast ýmist til hins betra eða verra og ekki hægt að fullyrða um ávinning. Sumir vilja líta á það sem alvöru ávinning að flýta því um eitt misseri eða tvö að endurheimta trúverðugleika erlendis, þó það kunni að þykja ansi léttvægt þegar menn líta um öxl eftir áratug eða tvo. 

Flokkarnir eru ósammála

Nú er það svart í ESB, enn svartara!

Framkvæmdastjórn ESB sendi frá sér nýja spá um samdrátt í efnahag sem er meira en tvöfalt svartari en spá frá því í janúar. Tók það fjóra mánuði að átta sig? Samdrátturinn á evru-svæðinu verður ívið meiri en í Evrópusambandinu í heild. Það gerir auðvitað evran. Nú spá José Manuel Barroso og félagar í Brussel samdrætti á næsta ári líka, en ekki hagvexti eins og í janúar.

Atvinnuleysi mun aukast og verða 10,9%. Sé evru-svæðið tekið út verður það 11,5% í Evru-landi lok næsta árs. Það gerir auðvitað evran. Grikkland, Spánn og Írland eru nokkur fórnarlamba evrunnar og nú hefur Finnland bæst í hópinn. (Sjá hér, fjórðu fyrirsögn: The Euro was a mistake for Finland.)

Á Íslandi skall kreppan á með hvelli á einni viku og afleiðingarnar komu í ljós á parti úr misseri. Í Evrópusambandinu gengur það hægar, kerfið hægir rólega á sér eins og risa-olíuskip eftir að hafa misst vélarafl. Það er lengi að stoppa. Og það verður líka mjög lengi að komast af stað aftur, meðan minni sjóför bruna framúr. Spá kommissara Barrosos sýnir að ESB skipið er að verða vélarvana.

Eitt getum við samt verið viss um. Samfylkingin heldur fast við að innganga í ESB sé góð "aðgerð í efnahagsmálum". Að eina von Íslands sé að taka þátt í hægfara hnignuninni. Hún kvikar ekki frá því að sækja um aðild og fara í aðildarviðræður.

Væri kannski nær sanni að tala um "uppgjafarviðræður"?

Efnahagslægðin dýpri og lengri en áður var talið

Loddari með töfralyf á flösku

Það er ekki hægt að lækna magasár með því að setja rauðan plástur á vinstra hnéð. Það vita allir.

En það er allt eins líklegt að innhverf íhugun sem David Lynch kynnir geti verið til bóta. Kannski ekki ein og sér fært þjóðinni heilbrigði, sköpunarmátt, velmegun og frið, en Lynch gerir í það minnsta ekki út á snákaolíu. Enda er alþýðan bæði læs og skrifandi og betur upplýst en á tímum villta vestursins.

Fyrr á öldum ferðuðust loddarar þorpa á milli í vestrinu og seldu töframeðal. Lykillinn að velgengni var tungulipurð loddarans og vanþekking alþýðunnar á sjúkdómum. Töframeðalið gat læknað hvað sem er. Sumir höfðu með sér brellumeistara til að setja á svið "kraftaverk" og blekkja lýðinn. Því fleiri sem létu blekkjast, því betri var salan.

Þó tölvuöldin sé gengin í garð eru enn til loddarar af ýmsu tagi. Einn hópur þeirra ferðast um með Töframeðalið ESB á flöskum og reynir að selja lýðnum. Lykillinn er tungulipurð loddarans og vanþekking alþýðunnar á innihaldinu. Brellumeistarinn heitir Evra.

Það ljóta við loddarana er að þeir nýta sér vanþekkingu fórnarlamba sinna. Með aukinni almennri þekkingu á heilsu og sjúkdómum hættu menn að geta selt töframeðal í villta vestrinu. Alveg eins er það með Töfralyfið ESB. Því betur sem viðskiptavinirnir þekkja það, því erfiðara verður að selja. Þess vegna ríður mikið á að selja varninginn strax, áður en kaupendur sjá að varan er plat.

Jacques Chirac, fyrrum forseti Frakklands, sannreyndi þetta árið 2005. Þá lét hann prenta Stjórnarskrá Evrópusambandsins í stóru upplagi og bera í öll hús í Frakklandi áður en þjóðaratkvæði var greitt. Á einni viku jókst andstaðan um 10 prósentustig og stjórnarskráin var felld.

Samfylkingin vill ekki brenna sig á þessum lýðræðisæfingum og leggur ofurkapp á að sækja um aðild strax í maí og hefja viðræður um í júní. Selja vöruna áður en kaupendur geta kynnt sér innihaldið og það er um seinan.

ESB stendur fyrir Eitruð Samfylkingar-blanda. Innihaldið er tveir skammtar af úrræðaleysi, þrjú villuljós, dass af skrumi og uppgjöf í ómældu. Ekki er veittur afsláttur af kaupverði.

 

Kynna sér innhverfa íhugun

SAMMÁLA - til hvers?

Þar höfum við það. Stjórnmálafræðingur segir að ríkisstjórnin þurfi ekki að vera sammála, Alþingi þarf ekki að vera sammála og þjóðin þarf ekki að vera sammála.

"Þetta er algjörlega borðleggjandi" segir stjórnmálafræðingurinn, ESB gerir engar kröfur um einhug um aðildarumsókn.

Ef Samfylkingin vill getur hún sótt um ríkisborgararétt fyrir 320 þúsund Íslendinga í Evrópuríkinu, án þess að spyrja þá. Hún þarf ekki lýðræðislegt umboð frá þjóðinni, bara túlka kosningaúrslit sér í hag og láta vaða. Það er algjörlega borðleggjandi, segir stjórnmálafræðingurinn.

Einu "skýru skilaboðin" frá þjóðinni sem ég get lesið úr úrslitum kosninga eru að Sjálfstæðisflokkurinn eigi ekki að fara í ríkisstjórn. Mér er fyrirmunað að sjá skilaboð, hvað þá kröfu, um að ný ríkisstjórn leggi inn umsókn um aðild Íslands að ESB gegn vilja rúmlega helmings þjóðarinnar.

Hvað segir annars orðabókin um orðið "lýðræði"?

 

Áttu 18 sekúndur aflögu?
Þá mæli ég því að smella hér og lesa fáein erindi eftir skáldið Gunnar Dal.

 

Þarf ekki einhug um umsókn

"Frávik koma ekki til greina"

Steingrímur Joð og Jóhanna halda áfram að finna lausn á "ESB vandanum". Íslandsvinurinn Olli Rehn, stækkunarkommissar ESB, segir þetta í dag:

"En landið verði að uppfylla öll skilyrði aðildar og gangast undir reglur sambandsins um sjávarútveg. Frávik komi ekki til greina." 

Eru það ekki einmitt samningsmarkmið allra flokka; að semja um frávik frá reglum sambandsins um sjávarútveg? Er ekki kominn tími til að hætta þessari ESB vitleysu og ganga bara í Ísland?

Sjá fréttina á RÚV.is

 

Viðræður hefjast klukkan fimm

... þá geng ég í Sjálfstæðisflokkinn

Ég hef alltaf kosið til vinstri en aldrei Sjálfstæðisflokkinn. Aldrei. Núna fékk VG atkvæði mitt vegna andstöðu sinnar við ESB, tvö síðustu skiptin á undan setti ég x-ið við S-listann.

Vinstri grænir gefa sig út fyrir að vera staðfastur flokkur. Að maður geti treyst þeim.

Ef Steingrímur og VG gefa sig í þessu máli (sem er það eina sem kemst að hjá Jóhönnu og Samfylkingunni) þá eru allir og allt til sölu. Þá eru engin prinsipp til. Þá er fullreynt með félagshyggjuna og allt eins hægt að snú sér til hægri. Þá geng ég í Sjálfstæðisflokkinn.

Þó ekki skilyrðislaust.

Ef hann finnur kjarkinn sem hann týndi, fer í naflaskoðun, losar sig við þá sem hann hefði átt að losa sig við, afneitar frjálshyggjunni, hverfur aftur til gamalla borgaralegra gilda þar sem velferðin á samleið með einkaframtakinu, gerir kröfur um að ábyrgð fylgi frelsinu og að gagnsæi fyrirbyggi spillingu og stendur undir nafni, þá .... já, þá geng í flokkinn.

 

 

Evrópumálið sett í forgang

Hús Evrópu

Í húsi þínu, Evrópa
er engum hleypt í ræðustól
sem talar aðeins af viti

Til einskis
voru máttarstólpar þínir
settir í vorhreingerningu

Til einskis
voru ósannindin
skreytt að utan

Alltaf má þó treysta
dekurbörnum
til að styðja rangan málstað

með nýjum upphróunum.

Trúðar þínir, Evrópa
setja okkur reglur
í stað réttar.

Þeir sem láta öll orð
standa á haus
þykjast vera upphaf nýrra tíma.

Texti verka þeirra er fagmannlega samin
grafskrift.

Forstjórinn
situr með taminn hund
í garði sínum.

Nokkur erindi úr ljóðinu Hús Evrópu eftir Gunnar Dal, úr samnefndri ljóðabók.

Getum valið úr öðrum kostum

ESB dæmir rök Samfylkingar ómerk!

Framkvæmdastjórn ESB hefur upplýst að reglan um "hlutfallslegan stöðugleika" verði að líkindum lögð af. Hún hefur verið grunnurinn að ekkert-að-óttast málflutningi Samfylkingarinnar um fiskveiðar Íslendinga eftir inngöngu í ESB.

Skal gert, heitir bókin sem geymir stjórnamálályktun S-lista. Þar segir á bls. 65:

Söguleg veiðireynsla er hornsteinn sjávarútvegsstefnu Evrópusambandsins og við honum hefur aldrei verið hróflað allt frá upphafi.

Óttinn við að Evrópusambandið ákveði að breyta þessum hornsteini sjávarútvegsstefnunnar er með öllu ástæðulaus.

Æ, æ. Nú gildir þetta ekki lengur.

Því miður var ástæða til að óttast. Nú á að hrófla við reglunni og jafnvel leggja hana af! Hvað kemur í staðinn? (Sjá um fréttina hér.)

Þetta er vægast sagt óheppileg tímasetning. Að Framkvæmdastjórn ESB skuli ógilda aðal "rök" Samfylkingarinnar, kortéri fyrir kosningar. Og það þrátt fyrir að kommisar sjávarútvegsmála sé "vinur okkar" frá Möltu. Hann er kannski búinn að senda Jóhönnu SMS og biðjast afökunar á þessari fljótfærni. Að hafa ekki þagað yfir sannleikanum fram yfir kosningar.

Á bls. 67 í Skal gert er svo þessi klausa:

Að auki má festa regluna um hlutfallslegan stöðugleika og þar með að Ísland eitt sitji að kvóta í íslenskri lögsögu í aðildarsamning Íslands við Evrópusambandið.

Þetta er ekki hægt þegar reglan er ekki lengur til. Hún hefur reyndar aldrei verið til nema sem samkomulag, en ekki skráð í lög. Svo það er létt verk að leggja hana af. 

Samfylkingin enn stærst