Kaldal á hvolfi

Leiðari Fréttablaðsins í dag er helgaður Heimssýn, sem er hreyfing sjálfstæðissinna í Evrópumálum. Félagsskapur fólks sem telur að hag Íslands sé betur borgið utan Evrópusambandsins og hélt aðalfund sinn um helgina.

Höfundur leiðarans, Jón Kaldal, byrjar á því að segja Heimssýn vera "með sérstakari söfnuðum landsins". Svona stimplagerðar er oft gripið til af þeim sem annað hvort hafa fátækleg rök eða vondan málstað að verja. Þá er gert lítið úr andstæðingnum til að forðast sjálft málefnið.

Ýmislegt fleira í þessum dúr fylgir síðan; um hægri og vinstri, skynsemi og trúarhita, en leiðarann má lesa hér.

Það er síðasta setningin sem er mest úr takti við raunveruleikann. Hún er um þá hugmynd að draga aðildarumsókn til baka og hljómar svona: 

Ómögulegt er að skilja af hverju Ragnar og skoðanasystkini hans vilja koma í veg fyrir að málið fái að hafa þann sjálfsagða og lýðræðislega gang.

Þetta er rugl.

Hér snýr skrifarinn hlutunum á hvolf. Það er einmitt vegna þess að málið á að fá sjálfsagðan og lýðræðislegan framgang að menn vilja draga umsóknina til baka núna.

Lýðræðisleg ákvörðun verður ekki tekin nema menn fái að kjósa (innan þings eða á landsvísu) þar sem viðhafðar eru frjálsar og sanngjarnar kosningar. Það var ekki gert. Í atkvæðagreiðslu á Alþingi 16. júlí greiddu nokkrir þingmenn atkvæði með tillögu um aðildarumsókn við þvingaðar aðstæður: Undir hótunum um stjórnarslit. Pólitíkst ofbeldi af þessu tagi er afbökun á lýðræðinu.

Ríkjandi stjórnvöld, sama hvaða flokkar eiga í hlut, geta ekki tekið meiriháttar ákvarðanir sem varða afdrif þjóðarinnar nema hafa til þess skýrt umboð. Löggjafi og ríkisstjórn eiga að vinna í umboði þjóðarinnar. Ríkisstjórnin sem nú situr hefur ekki það skýra umboð frá þjóðinni sem ætti að vera sjálfsögð krafa í lýðræðisríki. Ekki síst þegar um svo stórt mál er að tefla.

Við þetta bætis að utanríkisráðherra hefur legið svo mikið á að hann hefur anað áfram með málið, gegn þeim tilmælum sem fram koma í áliti meirihluta utanríkismálanefndar Alþingis.

Vönduð stjórnsýsla, fagleg vinnubrögð og lýðræðið sjálft hafa verið fótum troðin í þessu máli. Ef menn meintu eitthvað með kröfunni um Nýja Ísland, þá ætti að vinna þetta mál með allt öðrum hætti og fyrst og fremst að hafa lýðræðið í heiðri.

Hugmynd Heimssýnar gengur því út á að tryggja að málið fái alvöru lýðræðislegan framgang en ekki að koma í veg fyrir það eins og leiðarahöfundur Fréttablaðsins telur. Af skrifum hans verður ekki annað séð en að hann hafi ekki verið á fundi Heimssýnar á sunnudaginn.

 

Athugasemdir

[Theódór Norðkvist, 17.11.2009 kl. 19:51]

Sumir vilja þessa tvöföldu þjóðaratkvæðagreiðslu (þjóðaratkvæðagreiðslu um hvort við eigum að hafa þjóðaratkvæðagreiðslu) mig minnir að þú sért einn þeirra.

Á sama tíma gagnrýna þeir kostnað við samningaviðræðurnar. Tvöföld þjóðaratkvæðagreiðsla hlýtur að kosta meira en að kjósa bara um gerðan samning, ekki satt? Hvernig geta þeir tvöföldu þá gagnrýnt hina einföldu?

[Haraldur Hansson, 17.11.2009 kl. 20:53]

Ég segi ekki orð um kostnað. Gagnrýnin sem þú talar um beinist að því að fara út í aðgerð sem kostar yfir 1.000 milljónir (kostnaður innan kerfis þá ekki talinn með) án þess að hafa skýrt umboð til þess frá þjóðinni.

Ég er að tala um prinsipp. Að virða leikreglur lýðræðisins. Ef menn ætla að koma svona máli í gegn með yfirgangi, fótum troða lýðræðið og réttlæta það svo eftirá með því að það sé verið að spara kostnað sem er innan við 10% af heildarpakkanum ... ja þá erum við komin út á hættulega braut.

[Jón Valur Jensson, 18.11.2009 kl. 05:13]

Frábærlega vel haldið hér á spöðunum hjá þér, vökumaður, í krufningu og svari við þessum fráleita leiðara. Jón Kaldal er margafhjúpaður Evrópubandalagspredikari sem hefur trúlega verið plantað í ritstjórnarstól Fréttablaðsins af EB-sinnuðum Baugsskuldasöfnurum og/eða Þorsteini Pálssyni. Það er ekki við betra að búast frá þessu liði, en gott þegar menn taka við sér og sýna fram á öfugsnúnar meinlokur þeirra.

[Sigurður Sveinsson, 18.11.2009 kl. 07:41]

Föstudagskvöldið fyrir kosningar afneitaði Steingrímur ESB. Flokkurinn hans fékk mitt atkvæði mestmegnis út á það. Mér fannst ég illa svikinn. Reyndar er minn þingmaður Atli Gíslason og hann hefur ekki brugðist. Það var ömurlegt að horfa á marga þingmenn VG lýsa andstöðu sinni við VG og segja svo já. En það er líka ömurlegt að fylgjast með málflutningi aðildarsinna. Þeir uppnefna okkur sem andæfum. Við erum ekki með réttu ráði og ég er t.d. talinn fatlaður á geði af því ég vil ekki inngöngu í ESB. Ég hef að vísu ekkert vottorð um geðheilbrigði eins og Ólafur Magnússon en tel mig nú samt svona nokkurveginn normal. Það er líka athyglisvert að fylgjast með rógsherferðinni sem er hafin gegn Ásmundi Einari Daðasyni. Glæsilegasta fulltrúa yngri kynslóðarinnar sem nú situr á þingi. Þar fer maður sem ég vænti mikils af. Og því miður eru það ekki bara aðildarsinnar sem standa fyrir þessum rógi. Bendi t.d. á þann sem kommenterar hér fyrir framan mig.

[Jón Valur Jensson, 18.11.2009 kl. 09:04]

Ég met mikils þá hreinskilni Sigurðar sem birtist hér í innlegginu á undan, þar sem hann upplýsir um niðrandi "málflutning aðildarsinna", þ.e. Samfylkingarmanna, geri ég ráð fyrir. En hvað meintan róg snertir gegn Ásmundi Daða, þá er rógur nú einu sinni það sem ranglega er borið á menn, en ekki er það ósatt, sem ýmsir gagnrýna Ásmund fyrir og þ. á m. ég, að hann tók afstöðu gegn þjóðarréttindum okkar í Icesave-málinu. Svo geta menn treyst honum til formennsku í Heimssýn, þeir sem það vilja, en þeir geta ekki ætlazt til þess af öðrum.

[Sigurður Sveinsson, 18.11.2009 kl. 10:34]

Ég sé bagalega villu í athugasemd minni. Ég átti að sjálfsögðu við að margir þingmenn VG hefðu lýst andstöðu sinni við ESB en sagt svo já við aðildarumsókninni. Í framhaldi af nýju kommenti guðfræðingsins þá er mér nú alls ókunnugt um að Ásmundur hafi tekið afstöðu gegn þjóðréttindum okkar í Icesave málinu. Fjarvera hans þegar málið var afgreitt úr nefndinni sannar ekkert í þeim efnum. Í mínum augum breytir álit Jón Vals á Ásmundi engu. Að sjálfsögðu má hann gagnrýna hann eins og honum sýnist. Ásmundur er mjög glæsilegur fulltrúi ungra íslendinga á þingi. Og hann er líka góður fyrir okkur sem erum komin yfir miðjan aldur. Hann er þingmaður sem ég er ákaflega stoltur af. Það er meira en ég get sagt um flesta aðra. Þeir verða taldir með fingrum annarar handar.

[Jón Valur Jensson, 18.11.2009 kl. 14:53]

Sigurður, þú ert bara ekki nógu upplýstur um afstöðu Ásmundar Einars í Icesave-málinu. Á tveimur útvarpsstöðvum í fyrradag kvaðst hann myndu líklega greiða atkvæði með nýja frumvarpinu (sjá HÉR! og innlegg Axels Jóhanns Axelssonar HÉR í gær kl. 13:51). Það er alveg sama hversu myndarlegur maður hann kann að vera, ÞETTA er ekki glæsileg afstaða og (sorrý!) ekki gæfulegt upphaf á 2. löggjafarþinginu sem hann situr. Samhryggist þér, þjóðvinur.

[Sigurður Sveinsson, 18.11.2009 kl. 15:27]

Ég ætla ekki að munnhöggvast frekar um Ásmund Einar Daðason. Við skulum líka bíða með fordæmingar uns við sjáum hvernig þingmenn kjósa í Icesave málinu. Það er rétt að Ásmundur Einar er myndarmaður. Það sem ég á þó fyrst og fremst við er það sem er inní höfðinu. Því miður er allt morandi í grautarhausum á þingi, sem hafa hamast þar árum saman. Flestum til ama og tjóns.Vonandi tekst okkur að hreinsa þar ærlega til í næstu kosningum. Ég þakka nafngiftina þjóðvinur. En ég er alls ekkert hryggur í dag.

[Jón Valur Jensson, 18.11.2009 kl. 17:51]

Þú áttir sannarlega skilið að fá þá nafngift, Sigurður.

[Haraldur Hansson, 18.11.2009 kl. 19:38]

Takk fyrir ágæt skoðanaskipti ykkar, Sigurður og Jón Valur.

Ef IceSave væri alveg kristaltært þyrftum við ekki að velta þessu fyrir okkur. Ábyrgðin yrði felld 43:20 (Samfylkingin segir öll já, sama hvað stendur í plagginu). Ég hef lengi haft á tilfinningunni að það sé eitthvað ljótt í þessu máli sem við almennir kjósendur fáum ekki að vita um. Það kann því að vera flóknara að greiða atkvæði á þingi en tjá sig á blogginu.

Bendi bara á þessa frétt um ræðu Ásmundar Einars í þinginu í dag og ítreka að ég bind miklar vonir við hann sem formann Heimssýnar. Þangað til annað kemur í ljós lít ég á hann sem ungan og öflugan leiðtoga fyrir góðan málstað.