Ummæli ársins 2009 á Jóhanna Sigurðardóttir

Þegar áramótin nálgast er það til siðs að líta um öxl og rifja upp helstu viðburði ársins. Það er af nógu að taka þetta árið, en ég ætla að láta duga að velja ummæli ársins.

Í fyrra var það Davíð Oddsson sem hafði vinninginn með ummælum í frægum Kastljósþætti um að við ætluðum ekki að borga erlendar skuldir óreiðumanna. Sýndist sitt hverjum um þau orð þáverandi seðlabankastjóra.

Jóhanna Sigurðardóttir er sigurvegari ársins 2009 fyrir þessa setningu:

Við megum ekki láta hagsmuni fárra víkja fyrir hagsmunum margra.

Þetta sagði Jóhanna í stefnuræðu sinni á Alþingi 18. maí. Töldu menn víst að hér væri um mismæli að ræða en síðar kom í ljós að þetta var rétt lesið af handriti forsætisráðherrans. Jóhanna hefur því miður staðið við þessi orð sín.

Árni Páll Árnason er í örðu sæti fyrir þessi ummæli:

Það er ekki í mannlegu valdi að bæta fólki það sem gerðist í bankahruninu.

Þetta sagði félagsmálaráðherra í viðtali 4. ágúst. Venjulega er ekkert að marka það sem hann segir og það dregið fljótlega til baka. T.d. ákvarðanir um skert eða stytt fæðingarorlof og nú í dag frumvarp um félagsþjónustu. Því miður hefur ráðherrann staðið við stóru orðin frá því í ágúst.

Það koma margir til greina í næstu sæti. Steingrímur J Sigfússon fyrir viðsnúning á skoðunum sínum um Evrópusambandið, IceSave og þjóðaratkvæði og Össur Skarphéðinsson fyrir makalaust bull af ýmsu tagi um Evrópusambandið og skýringar á því hvers vegna Íslendingar sóttu um aðild. Sigmundur Ernir Rúnarsson kemur sterkur inn fyrir að breytast í sandkassabloggara "á einu augabragði". En það skákar enginn Jóhönnu þetta árið.

 

Athugasemdir

[Guðrún Sæmundsdóttir, 15.12.2009 kl. 22:16]

Sammála!

[Ingvi Rúnar Einarsson, 16.12.2009 kl. 00:10]

Það verður fróðlegt,að hlusta á ræðu Jóhönnu,sem og Forseta Íslands á gamlársdag.

[Axel Þór Kolbeinsson, 16.12.2009 kl. 09:59]

Ég styð Sigmund Erni í þriðja sætið.

[Snæbjörn Björnsson Birnir, 16.12.2009 kl. 13:16]

Skil vel að þér verði lítt ágengt í pólitískri málfræði. (sbr. kynningu þína)

Ef þú ferð inn á vef Alþingis og lest ræðuna, þá muntu sjá að þetta var leiðrétt af Jóhönnu sjálfri.

Hef aðra tillögu að ummælum ársins. "Við viljum ALLT upp á borðið", sem Þorgerður Katrín kom með og endurtók í sífellu, þangað til einhver minntist óvart á kúlulán hennar og eiginmannsins. Síðan hefur farið lítið fyrir henni. Legg til að þau ummæli fari í 1.,2. og 3ja sætið, vegna allra endurtekninganna. 

[Margrét Elín Arnarsdóttir, 16.12.2009 kl. 13:34]

Snæbjörn, svona eins og allt upp á borðið, gagnsæi og skjalborgin hjá ríkisstjórninni? Nei ég held að Haraldur hitti naglann á höfuðið í upptalningu sinni!

[Birgir Viðar Halldórsson, 16.12.2009 kl. 15:39]

Góður!

[Ómar Ragnarsson, 16.12.2009 kl. 18:14]

Höskuldur Þórhallsson sagði á sínum tíma í þingræðu að "nú yrðu Íslendingar að taka sinn gríðarlega vanda "almennilegum vettlingatökum."

Mér fyndist það mjög ósanngjarnt að láta þetta mismæli verða að setningu ársins.

Allur málflutningur Jóhönnu Sigurðardóttur frá upphafi ferils hennar sýnir að tilgreind ummæli hennar hér að ofan voru mismæli af sama toga og hjá Höskuldi Þórhallssyni.

Það er af nógu að taka hvað snertir önnur ummæli sem voru ekki mismæli.

[Haraldur Hansson, 16.12.2009 kl. 18:21]

Takk öll fyrir innlitið og athugasemdirnar.

Snæbjörn: Hér er talað um "ummæli" og þetta er það sem stóð í handritinu og þetta er það sem Jóhanna sagði. Þú getur smellt hér og hlustað á upptöku, þetta er á 1:54 min. Framkvæmdir hafa líka verið í einmitt þessum anda, hvað sem föndrað hefur verið í skjalasafni Alþingis.

Tillaga þín um að bæta Þorgerði Katrínu á listann er ágæt, kannski koma fleiri góðar tillögur.

[Haraldur Hansson, 16.12.2009 kl. 18:33]

Ómar: Misritun eða mismæli. Eyjan birti handrit Jóhönnu í maí og þar var þetta skrifað svona. Auðvitað veit ég að þetta var ekki meiningin, en þetta eru samt "skemmtileg" ummæli í ljósi framvindunnar.

Sigurður Kári mismælti sig líka klaufalega á landsfundi Sjálfstæðisflokksins, þegar hann eignaði flokknum sínum kvótann á Íslandsmiðum. Þau mismæli voru birt á fjölmörgum bloggsíðum. Ég mundi bara ekki eftir því þegar ég var að setja saman þessa færslu. Annars hefði ég haft hann á listanum líka, líklega í 2. sæti. Enda á færslan ekki að vera grafalvarleg eingöngu.

[Brjánn Guðjónsson, 16.12.2009 kl. 19:03]

ég tel ummæli Jóhönnu hafa verið mismæli á sínum tíma, þrátt fyrir að reyndin hefur sýnt að þau virðast halda.

hvað varðar ummæli gapuxans, tel ég ekki um mismæli að ræða heldur froðu að hætti hússins.

[Brjánn Guðjónsson, 16.12.2009 kl. 19:04]

reyndin hafi sýnt, vildi ég sagt hafa.

[Jón Á Grétarsson, 17.12.2009 kl. 23:18]

Góður pistill Haraldur.   Svo má ekki gleyma einum af mörgum bull-frösum Samfylkingarinnar:  "Við ætlum að slá Skjaldborg um heimilin"