Smárason 9/11

"Í greinargerð efnahagsbrotadeildar er einnig lýst miklum fasteignagjörningum um, meðal annars Fjölnisveg 9 og 11, sem Hannes og sambýliskona hans eru sögð hafa keypt á undirverði" segir m.a. í viðtengdri fréttaskýringu um meint brot Hannesar Smárasonar.

Það er þetta með húsnúmerin og aðrar tilviljanir.

Árásirnar á tvíburaturnana í New York voru hryðjuverk. Hér hefur verið talað um Hrunið sem efnahagslegt hryðjuverk.

Í turnunum var World Trade Center til húsa og hýsti helstu stoðir viðskiptalífsins. Hannes stýrði fyrirtæki sem breytti nafni sínu í Stoðir.

Hryðjuverkamenn notuðu flugvélar við árásirnar. FL Group (áður Flugleiðir) notaði flugvélar í rekstri sínum.

Í Ameríku ganga hryðjuverkin í daglegu tali undir nafninu 9/11. Hannes býr/bjó á Fjölnisvegi 9/11.

Tvíburaturnarnir á Manhattan hrundu til grunna og það gerðu bankakerfið og efnahagurinn á Íslandi líka.

Hér má finna fróðleik um Stoðir ehf (áður FL Group og þar áður Flugleiðir hf).

Meint brot Hannesar Smárasonar

Athugasemdir

[Haraldur Baldursson, 25.6.2009 kl. 18:08]

Það lyktar vissulega af því að Hannesi hafi þótt álíka erfitt og Rauðhettu að halda sig við stíginn í skóginum, en það er etv. full djúpt í árina tekið að setja upp samanburð á 9/11 og Hannesi Smárasyni. Þó ég viti ekkert meira en aðrir um mál hans vonar maður að mögulegar glæpsamlegar athafnir hafi ekki verið of kaldrifjaðar (það er tæplega hægt að kæra svona ummæli, þegar maður tiplar svona gætilega um sleggjudóma-salina )

[Finnur Bárðarson, 25.6.2009 kl. 18:34]

Hannes er kaldrifjaður inn að beini. Vonandi kemur það í ljós.

[Haraldur Hansson, 25.6.2009 kl. 18:34]

Nafni, hvað segir orðabókin þín um "sleggjudóma"?

Í fréttinni segir líka að ekki hafi verið gefin út nein ákæra vegna þeirra atriða sem eru til rannsóknar. Það átti að vera í færslunni en gleymdist. Eins og færslan ber með sér er hún ekki hugsuð sem dómur eða ásökun. Þetta með 9/11 var bara svo sérstakt að maður varð að setja það á blað!

[Haraldur Baldursson, 25.6.2009 kl. 18:37]

 samlíkingin er ekki algalinn...

[NN (IP-tala skráð) 25.6.2009 kl. 18:57]

Sniðug færsla, gaman að svona kenningum :)

Þetta er einhver þýðing úr Nostradamusi: (sleppti að vísu geimverustríðinu í kaflanum á undan...)

Sakleysingjar verða fyrir bágindum. Íslendingum misboðið

Plágan mikla sem fellur á sjávarborgina

mun ekki sjatna fyrr en hefnt hefur verið

fyrir blóð hinna réttlátu. Þau verða dæmd

til gjalda fyrir glæp sem þau

hafa ekki drýgt. Með yfirborðsmennsku verður

hinu mæta lýðveldi gert rangt til.

La grande peste de cité maritime,

Ne cessera que mort ne soit vengee

Du iuste sang par pris damné sans crime,

De la grand dame1 par feincte n'outragee.

II:53

1) Dame; kona. Marianne er persónugervingur franska lýðveldisins. Táknorð fyrir lýðveldi í spádómum Nostradamusar.

-----

Niðurlæging íslenska lýðveldisins skapar valdamikinn þjóðarleiðtoga

Eftir það kemur frá landi á hjara veraldar

germanskur leiðtogi til æðstu valda.

[Það verður þegar] ánauðinni er mætt

með byltingu. Lýðveldið verður við lýði

[en] vekur ekki lengur aðdáun.

Apres viendra des extremes contrees,

Prince1 Germain, dessus le throsne doré:

La seruitude & eaux2 rencontrees,

La dame3 serue, son temps plus n'adoré.

II:87

En hvað þýðir Fjölnir?

Kv.

[Jón Bragi Sigurðsson, 25.6.2009 kl. 20:52]

Gaman að þessum pælingum öllum. Ég held hins vegar að þetta hljóti að hafa verið Pólverjar sem FL-group var með í vinnu því að launin eru svo hlægilega lág. Mér reiknast til að launakostnðaur hvers starfsmanns hafi eingöngu verið 5,3 milljónir á mánuði... :)

[Alfreð Símonarson, 26.6.2009 kl. 12:12]

Og hvortveggja innanbúðarverk!

[Gunnar Gunnarsson, 27.6.2009 kl. 13:16]

Lunkið val á fyrirsögn.