"Það hlýtur að vera EITTHVAÐ gott við ESB"

Í meðfylgjandi viðtali er spurt hvort ekki sé eitthvað gott við ESB. Viðmælandinn er þingmaðurinn Daniel Hannan, sem á sæti á Evrópuþinginu fyrir breska Íhaldsflokkinn. Svar hans er í stuttu máli: Nei, ekkert!

Svör þingmannsins eru skýr og athyglisverð, en viðtalið er 3ja mín. langt. Hannan er líka spurður hvort halda eigi þjóðaratkvæðagreiðslu um Lissabon samninginn (reform treaty), sem Gordon Brown, formaður bresku Samfylkingarinnar, sveik breska kjósendur um þrátt fyrir hátíðleg loforð.

Að loknu viðtalinu eru nokkrir breskir borgarar teknir tali. Þeir kvarta yfir skertu fullveldi og sterku Brusselvaldi. Einn segir að Norðmenn hafi valið réttu leiðina með veru utan sambandsins og aðild að EES.

Bretarnir kvarta líka yfir því að ESB sé ekki lengur það efnahagsbandalag sem þeir gengu í á sínum tíma heldur pólitískt sambandsríki Evrópu (political Federal state of Europe). Einn vill láta endurskoða málin og hverfa aftur til efnahagssamvinnu en ekki fara inn í Evrópuríkið (Federal Europe) sem nú er í burðarliðnum. 

Daniel Hannan hefur skrifað greinar í Fréttablaðið þar sem hann varar Íslendinga sterklega við því að ganga í ESB. Það sem fram kemur í þessu myndbandi eru allt atriði sem Íslendingar ættu að skoða núna. Ekki bíða, ráfa inn í ESB í kreppu og vera svo vitur eftirá. Það er of seint.

 

Athugasemdir

[Ævar Rafn Kjartansson, 19.6.2009 kl. 22:51]

Þetta þarf ég að skoða betur.

[(IP-tala skráð) 20.6.2009 kl. 10:36]

Ég hef alltaf sagt síðan að ég snerist í heilan hring,( var nefnilega svo vitlaus að vera fylgjandi inngöngu) að hver sá sem nennir að leggja þá vinnu á sig að lesa sér til í reglu og lagaverki ESB verður samstundis harður andstæðingur þessa bákns.

En því miður eru alltof margir íslendingar sem eru ginkeyptir fyrir því að taka auðveldu leiðina fyrir sig, láta misvitra menn lesa fyrir sig sem hafa jafnvel hagsmuni af því að ganga þar inn   og telja sjálfum sér trú um að um eitthvað sé hægt að semja.

Mér finnst í raun ekki skipta máli hvort  þeir "samningar" verði "góðir" eða slæmir því ég tel svona valdablokkir ekki eiga tilverurétt. 

Svona klíkur eru alltaf stofnaðar til að þvinga einhverju eða einhvern sem standa fyrir utan blokkina og það er aldrei ásættanlegt og leiðir alltaf til vandræða.

[Jón Halldór Guðmundsson, 20.6.2009 kl. 15:02]

Mér finnst nú ansi hart af þér að vera að gera grín að þessum breska íhaldsmanni. Það eru mörg dæmi um að þeir sem eru stuðningsmenn einhvers málstaðar reyni að verja eigin sjálf með því að halda því fram að ekkert sé að þeirra málstað. Og svo öfugt, til dæmis andstæðingar ESB aðildar viðurkenna ekki fyrir öðrum neitt jákvætt við aðild að ESB.

Það eru ekki allir eins víðsýnir og ég að hafa náð að sjá bæði kost og löst á málefni og taka svo yfirvegaða afstöðu til hvers máls, eftir að hafa séð hvort vegur þyngra að mínu mati.

[Haraldur Hansson, 22.6.2009 kl. 16:13]

Sæl öll og takk fyrir innlitið og athugasemdirnar.

Fyrir ári var ég frekar á því að ganga í ESB, en hugsaði ekki mikið út í það. Fór þá að gera eins og Sigurlaug; að kynna mér sambandið. Þá fóru að renna á mig tvær grímur, fyrst kom efi og svo andstaða. Því betur sem ég kynnti mér klúbbinn því minni var hrifningin og varð á endanum hrein og klár andstaða við aðild Íslands.

Jón Halldór, ég botna ekki í hvernig þú færð út að ég sé að gera grín að manninum. Þvert á móti. Ég tel innlegg hans gott og málefnalegt þó ekki þurfi allir að vera honum sammála.
Kannski hefur einhver kostur við ESB farið framhjá mér. Þú, víðsýnn maðurinn, myndir kannski vilja nefna 2-3 helstu kosti þess fyrir Íslands að ganga í ESB? Þá helst eitthvað annað en evruna þar sem deilt er um hvort hún yrði í raun til bóta. Ég kem ekki auga á neitt sem ekki þarf að gjalda fyrir með ókostum í leiðinni. Og ég er ekki að grínast!