Svíar mega selja snus!

Í Fréttablaðinu í dag er grein eftir Eirík Bergmann dósent, sem óhætt er að mæla með. Hún er líka birt á vísi.is.

Þar þylur hann upp allar undanþágurnar sem ríki hafa fengið við inngöngu í gamla Efnahagsbandalagið og síðar Evrópusambandið. Sumarhús í Danmörku, byggingarlóðir á Möltu, sérstakar undanþágur um bómullarrækt og fleira. Þetta er þulið upp til að sýna framá að við getum fengið undanþágur varðandi fiskveiðar, enda heitir grein hans Nr. 1 - Sjávarútvegur.

Og rúsínan í pylsuendanum er:
"Svíþjóð fékk heimild til að selja varatóbakið snus á heimamarkaði."

Þar höfum við það.

Úr því að Svíar mega selja snus og Danir eru ekki neyddir til að selja Þjóðverjum sumarhús, eigum við Íslendingar fullan rétt á undanþágum frá Rómarsáttmálanum og sjávarútvegsstefnunni til að geta ráðið yfir auðlind hafsins sjálfir.Þarf eitthvað að ræða þetta frekar?

Hugmyndir dósentsins að útfærslu koma fram síðar í greininni:

Þetta væri t.d. hægt að tryggja með því að gera fiskveiðilögsögu Íslands að sérstöku stjórnsýslusvæði innan sameiginlegrar sjávarútvegsstefnu ESB. Ekki er um að ræða almenna undanþágu frá sjávarútvegsstefnunni heldur sértæka beitingu á ákveðnu svæði á grundvelli nálægðarreglu þannig að ákvarðanir um nýtingu á auðlind Íslands sem ekki er sameiginleg með öðrum aðildarríkjum ESB yrðu teknar á Íslandi.

Í þessu liggur hættan.

Það er stórvarasamt að reyna að ramma Ísland inn í hina sameiginlegu sjávarútvegsstefnu ESB, enda er það mjög framandi hugmynd meðal sambandsþjóða að litið sé á fisk sem þjóðarauðlind. Það mun aldrei verða þannig við stóra hringborðið í Brussel. 

Og nálægðarreglan er ekki sá mikli öryggisventill sem Samfylkingin fullyrti í kosningaplaggi sínu Skal gert, eins og Grænbók ESB frá 22. apríl sýnir glögglega.Að ætla föndra eitthvað með fiskimiðin leikur að eldinum sem hæglega gæti skaðað okkur meira en IceSave í fyllingu tímans.

 

Íslendingar vilja á methraða í viðræður

Athugasemdir

[Einar Björn Bjarnason, 29.7.2009 kl. 16:13]

ÁHUGAVERT af honum Eiríki, að þylja upp undanþágur sem Bretar og Danir, hafa krafist gagnvart þáttum ESB, sem teknir hafa verið upp, eftir að þau ríki gerðust meðlimir að ESB.

Hann, gerir þarna engann greinarmun, þ.e. á samingsaðstöðu lands sem er að sækja um aðild og lands, sem er þegar meðlimur, og getur blokkerað nýja stefnu.

Kv.

[Helgi Hrafn Gunnarsson (IP-tala skráð) 29.7.2009 kl. 17:27]

Það er enginn ágreiningur um að við verðum að halda fiskimiðunum. Ágreiningurinn snýst um hvort við þurfum að gefa þær upp á bátinn eða ekki. Ef ekki er hægt að tryggja yfirráð okkar yfir fiskimiðunum, þá förum við ekkert þangað inn. Það er ekki fræðilegur séns í heitasta helvíti að þjóðin myndi kjósa með samningi sem gæfi slíkt upp á bátinn.

Þessi umræða hefur alltaf verið og er ennþá algerlega ótímabær. Það kemur í ljós hvort við fáum undanþágu eða ekki, og ef við fáum undanþágu er þetta ekkert mál. Ef við fáum ekki undanþágu, þá fer Ísland ekkert í ESB. Það er svo einfalt.

Svo virðist fólk afskaplega ringlað (réttilega kannski) yfir því hvað það þýði að sækja um aðild. Umsókn um aðild er ekki bindandi á neinn hátt, hvorki pólitískt né lagalega. Umsókn um aðild er eingöngu til að hefja viðræður. Athugið, hefja umræður.

Ég skil ekki hvaða voðalegu áhyggjur andstæðingar ESB hafi af fiskimiðunum okkar. Það kemur ekki til greina að gefa þær upp á bátinn. Jafnvel hörðustu stuðningsmenn innan ESB myndu aldrei samþykkja það, enda eins og ég segi, deilan snýst ekki um hvort við ættum að gefa fiskimiðin upp á bátinn eða ekki, heldur hvort ESB taki rök okkar gild. Ef ESB gerir það ekki, þá þýðir það einfaldlega að við getum ekkert farið í ESB.

Þó tek ég undir með greinarhöfundi að þetta er frekar dúbíus útfærsla þarna í endann, enda engin hætta á að við göngum í ESB ef við fáum ekki að halda óvéfengdum yfirráðum yfir fiskimiðunum.

[Kári Geir (IP-tala skráð) 29.7.2009 kl. 17:33]

"Það mun aldrei verða þannig"

Þú ert greinilega einn af þeim mönnum sem stundum segir aldrei, Haraldur. 

Ef í ljós kemur að þú hefur rétt hjá þér, þá fáum við öll að kjósa um hvort okkur líkar niðurstaðan. Og þú getur sagt 'ég sagð'ykkur það!'. Spurningin um hvort við getum samið um fiskinn hættir þá að naga okkur og margar ESB-raddir munu þagna.

Vertu kátur.

[Helgi Hrafn Gunnarsson (IP-tala skráð) 29.7.2009 kl. 17:49]

Jájá, ég nota hið góða orð aldrei mjög reglulega og sé ekkert að því.

Jesús mun aldrei snúa aftur, jólasveinninn mun aldrei verða til og Ísland mun aldrei ganga í ESB ef það glatar fiskimiðunum í leiðinni.

Ég er svo handviss um þetta vegna þess að ég hef aldrei, aldrei, aldrei heyrt nokkurn mann svo mikið sem gefa í skyn að við ættum að fara í ESB þrátt fyrir að glata fiskimiðunum. Eins og ég segi, jafnvel hörðustu stuðningsmenn ESB (eins og ég) tækju það ekki í mál. Það er enginn ágreiningur um þetta, hvorki innan Samfylkingarinnar né neins staðar annars staðar.

[Kolbrún Hilmars, 29.7.2009 kl. 18:42]

Það var fullyrt af hálfu ESB andstæðinga að ef hamrað yrði nóg á fiskveiðimálinu þá myndi almúginn gleyma öðrum hagsmuna- og réttindamálum þjóðarinnar.  Fullveldi þjóðarinnar og valfrelsi gegn umheiminum í heild viki fyrir nokkrum þorsksporðum.

Sýnist sú fullyrðing furðu nákvæm! 

[Gísli Ingvarsson, 29.7.2009 kl. 21:12]

Núna eru ESB andstæðingar að semja fyrirfram við ESB í huganum og hafa af því hina mestu skemmtun. Þeir eru búnir að semja af sér fullveldið og fiskveiðréttindin og sjálfstæðið ætla þeir náttúrulega að semja frá sér og ekki halda í neitt nema minnimáttarkenndina og sér íslenska víðsýnið sem nær í góðu skygni til Vestmannaeyja.

Við getum hugsanlega fengið undanþágu fyrir að fá að éta súrt rengi framleitt af Hval hf einu sinni á ári á þorrablóti Heimsýnar.

Hin áráttan er að semja eftirá um IceSafe samningana. Það er hver spekingurinn á eftir öðrum búinn að semja þvílíka fantagóða samninga við sjálfan sig að það á bara eftir að fara með þá til undirritunar í Hollandi og Bretlandi.

[Haraldur Hansson, 30.7.2009 kl. 08:10]

Takk öll fyrir innlitið og athugasemdirnar.

Einar Björn: Rétt athugað. Dósentinn nefnir heldur ekki að sumt af því sem hann telur upp stendur nýjum umsóknarríkjum ekki til boða. 

Helgi Hrafn: Ef það er útbreidd skoðun að umsókn um aðild að ESB snúist ekki um annað en "að hefja viðræður" er ekki að furða að 59% lýsi sig fylgjandi í könnun Fréttablaðsins í dag.

Ég þori líka að veðja bílnum mínum á að hörðustu stuðningsmenn munu berjast fyrir inngöngu þó engar varanlegar undanþágur fáist í útgerðarmálum. Þeir koma ekki heim með samning og hvetja svo kjósendur til að fella hann.

[Haraldur Hansson, 30.7.2009 kl. 08:20]

Kári Geir:Þekkir þú einhvern sem aldrei notar orðið aldrei? Ég óttast að það verði aldrei svo að fulltrúar 28 ríkja við stóra borðið í Brussel líti auðlind sjávar sömu augum og við.

Sumar þjóðanna stunda ekki sjávarútveg og hjá flestum hinna er útgerðin olnbogabarn sem er haldið uppi á styrkjum á grundvelli byggðarsjónarmiða. Hér verður útgerð að vera meginstoð. Áhrif okkar á þróun stefnunnar til framtíðar verða ekki afgerandi, jafnvel hverfandi.

Kolbrún: Þetta er nákvæmlega hættan. Þetta líka undirstrikar hvað það var misráðið að leyfa ekki þjóðinni að ákveða í einföldum kosningum hvort sótt yrði um. Þá hefði verið fjallað um stjórnkerfi ESB, hvað felst í umsókn, hvað innganga þýðir, hvaða vald er framselt, hvers vegna breyta þarf stjórnarskrá o.s.frv.  Þegar kemur að því að kjósa um samning er mikil hætta á að þessi grundvallarmál verða útundan. 

[Haraldur Hansson, 30.7.2009 kl. 08:25]

Gísli: Ef þér finnst sniðugt að hafa fullveldið í flimtingum, þá deili ég ekki þeirri skoðun með þér. Hefði kosið að fá málefnalegra innlegg.