Svona bara gerir maður ekki

Ef við ætlum að halda einhverri reisn þá verður að taka ESB-umsókn af dagskrá á meðan IceSave deilan er óútkljáð. Um það ættu allir að vera sammála, hvort sem þeir eru með eða á móti aðild Íslands að ESB.

ESB var/er beinn þátttakandi í IceSave deilunni. Afstaða þess var ekki hlutlaus og að margra dómi vafasöm; sambandið stóð vörð um eigið kerfi frekar en að leita réttlætis. Það má lesa úr gögnum málsins, nýlegum svörum Ingibjargar Sólrúnar og ýmsum skrifum um málið.

Nú er talað um að samþykkja ríkisábyrgð með fyrirvara. 

Enn hvílir leynd yfir ýmsum gögnum. Á meðan sannleikurinn í málinu er ekki á hreinu, á meðan eitthvað bendir til þess að ESB hafi ekki komið fram gagnvart Íslandi af réttlæti, þá eigum við ekki að sækja um aðild. Það þarf að klára IceSave fyrst og hreinsa andrúmsloftið. Þessu má líka stilla upp í tvær spurningar.

#1  -  Hvenær sækir maður um aðild að ESB?

• Þegar öruggur meirihluti þjóðarinnar styður það
• Þegar aukinn meirihluti þingheims vill það
• Þegar ríkisstjórnin er einhuga og vill sækja um
• Þegar IceSave deilan hefur verið útkljáð

#2  -  Hvenær sækir maður EKKI um aðild að ESB?

• Þegar eitt eða fleiri ofangreindra skilyrða er ekki uppfyllt

Í augnablikinu er ekkert skilyrðanna uppfyllt. Því ber að taka málið af dagskrá.

Það eitt að umsókn sé á dagskrá eru skilaboð um að við séum tilbúin að láta hvað sem er yfir okkur ganga. Slík þrælslund er Alþingi ekki sæmandi. Það er verra veganesti en samninganefnd Íslands hafði með sér á fund Breta og Hollendinga.

Að taka málið af dagskrá er yfirlýsing um að við ætlumst til þess að ESB fari eftir eðlilegum leikreglum og sýni okkur tilhlýðilega virðingu. Það verður að eyða öllum grun um meinta þátttöku þess í kúgun gegn Íslendingum áður en lengra er haldið.

 

Ekki formleg umsögn Seðlabanka

Athugasemdir

[Tómas Ibsen Halldórsson, 14.7.2009 kl. 13:11]

Það sætir furðu ef menn ætla að samþykkja ríkisábyrgð á Icesave-samningana með fyrirvara.  Slíkur fyrirvari hefur akkúrat enga þýðingu.  Maður skrifar ekki uppá víxil með fyrirvara, undirskriftin er bindandi.

Annað hvort veita menn ríkisábyrgð eða að þeir gera það ekki.  Að veita ríkisábyrgð með fyrirvar eða ekki með fyrirvara er dauðadómur yfir íslensku þjóðinni.

[itg (IP-tala skráð) 14.7.2009 kl. 13:36]

Hvað hefur ESB að gera við aðildarviræður við þjóð sem uppfyllir engin skilyrði aðildar.

Þetta eru aðildarviðræður!...ESB hefur aldrei farið í könnunnarviðræður...

[Haraldur Hansson, 14.7.2009 kl. 16:33]

Takk fyrir innlitið og athugasemdirnar.

Tómas, í öllum stöðum eru fleiri kostir en einn. Alþingi hefur um þrjá kosti að velja, kannski fleiri.

1. Að segja afdráttarlaust já, sem kallar yfir okkur skuldir sem við getum ekki staðið undir.
2. Að segja blákalt nei, sem e.t.v. kallar fram slæm viðbrögð Hollendinga, Breta og ESB og gerir áframhaldið erfitt.
3. Að samþykkja með fyrirvörum. Með því er samningnum tæknilega hafnað, en gert á diplómatískan hátt (og vonandi af kurteisi). Það þýðir að við viljum standa við skyldur okkar en ræða málin betur. Það er algjör óþarfi að óttast það, þrátt fyrir makalausan hræðsluáróður um refsiaðgerðir og einangrun.

ITG: Ísland uppfyllir skilyrði um að aðild að ESB, en það er hins vegar langt frá því að við uppfyllum skilyrðin um upptöku evrunnar, sem betur fer. Það er því raunveruleg hætta á að Samfylkingunni takist að koma landinu þarna inn.

[Rakel Sigurgeirsdóttir, 14.7.2009 kl. 22:20]

Takk fyrir gagnorðan pistil!

[Elle_, 14.7.2009 kl. 23:50]

Hvað á jörðinni eru þeir að eyða öllum tímanau sem ætti að fara í að bjarga landinu, í að sækja um aðild að EU og hvort sem við viljum sækja um eður ei? 

[María Kristjánsdóttir, 15.7.2009 kl. 10:33]

Góður pistill mitt í öllu þessu persónuníði, hótunum og öskrum.

[Tryggvi Helgason, 15.7.2009 kl. 10:58]

Þarna er komist vel að kjarna málsins hjá Haraldi.

Ég er þessum skoðunum alveg sammála.

[Haraldur Hansson, 15.7.2009 kl. 12:58]

Takk öll fyrir innlitið og athugasemdirnar.

Mitt svar við spurningu 2 er auðvitað að Ísland eigi aldrei að sækja um aðild að ESB, en þar sem færslan er um umsókn í skugga IceSave lét ég duga að taka ekki dýpra í árinni. 

[allial, 15.7.2009 kl. 16:42]

Algjörlega sammála höfundi. En því miður virðist þrælslundin vera ráðandi í okkar lundarfari.