Til hamingju Grænland

Við Íslendingar erum tæplega 6 sinnum fjölmennari en Grænlendingar (57.500). Þeir búa í landi sem er 21 sinni stærra en Ísland og telst strjálbýlasta ríki veraldar. Þar er náttúran víðast óblíðari en hér, menntakerfi og heilsugæsla ekki á sama stigi og atvinnuhættir fábrotnari. En Grænlendingar eru vissir um að það sé vænlegra til árangurs að stjórna málum sínum sjálfir en að vera undir aðra settir.

Grænlendingar fengu heimastjórn 1979 og sex árum síðar forðuðu þeir sér burt úr Efnahagsbandalagi Evrópu, forvera ESB. Megin ástæðurnar voru bann sambandsins við selveiðum og "hin skaðlega fiskveiðistefna ESB", svo notuð sé lýsing Roberts Wade.

Í gær héldu Grænlendingar upp á þjóðhátíðardaginn með því að öðlast fullveldi. Þar með fá þeir ýmsa málaflokka í sínar hendur, sem og yfirráð yfir eigin auðlindum. Danir fara þó áfram með utanríkis- og öryggismál o.fl.

Í austri eru svo önnur fámenn nágrannaþjóð, Færeyingar (48.800). Þegar kosið var til þings í Færeyjum fyrir tveimur árum var viðruð hugmynd um þátttöku í EFTA en engar fréttir eru um að þeir hafi áhuga á að ganga í ESB.

 

Á sama tíma og Grænlendingar fagna fullveldi eru til Íslendingar sem vilja fórna því. Það væri nær að samfagna með Grænlendingum og strengja þess heit að láta fullveldið aldrei af hendi. Og ekki væri verra ef Ísland gerði fríverslunarsamning við Grænland, sams konar þeim sem gerður var við Færeyjar. Það myndi ýta undir aukin samskipti þjóðanna.

Við eigum meiri samleið með fámennum nágrannaþjóðum okkar en fjölmennum iðnríkjum á meginlandi Evrópu. "Tími sjálfstæðra smáríkja er liðinn" sagði einn íslenskur uppgjafar- og ESB-sinni á bloggi í síðustu viku. Hvorki Færeyingar né Grænlendingar eru á því að smáríki geti ekki verið sjálfstæð. Við eigum ekki að ljá máls á því heldur.

Til hamingju Grænland.

 

Grænland vill aukin samskipti við Bandaríkin

Athugasemdir

[Jón Valur Jensson, 23.6.2009 kl. 03:44]

Góð grein hjá þér, Haraldur, virkilega gott framlag til umræðunnar og setur þessar nauðsynlegu staðreyndir um okkar næstu nágrannaríki inn í samhengið hjá okkur sjálfum og sýnir væntalega mörgum fram á, hve fráleitt er að hafna fullu sjálfstæði þjóðar okkar, eins og þó er stefnt að í einum pólitískum flokki sérstaklega.

En nú er fjárhagslegt og þjóðréttarlegt sjálfstæði lands okkar ekki tryggara en svo, að menn verða að fara niður á Austurvöll til þess að stuðla að því með nærveru sinni og réttmætum kröfum, að voðaverkum verði afstýrt á sjálfu löggjafarþingi okkar – þeim voðaverkum að samþykkja í 1. lagi ríkisábyrgð á óbærilegar Icesave-skuldir og í 2. lagi innlimun okkar í Evrópubandalagið.

Hvort tveggja voðaverkið væri svik við íslenzka þjóð, fortíð hennar og framtíð.

[Sverrir (IP-tala skráð) 23.6.2009 kl. 11:49]

Óska Grænlendingum sömuleiðis til hamingju.

Ég hef verið hrifin af landinu og verið að styðja grænslenska félagsráðgjafa í afar krefjandi verkefnum. Velferðarþjónustan þarna á virkilega langt í land að ná þeim gæðum sem við íslendingar myndum kalla lágmarks gæði.

Deili með þér hamingju óskum um þjóðhátíðardaginn en sýnist þessar vangaveltur um yfirráð yfir eigin málaflokkum sameiginlegt með umræðu okkar um Evrópusambandið. Við ráðum miklu mun meira og höfum ennþá miklu skárri efnahagslegar forsendur til að stjórna okkar málum, hvort sem við erum innan ESB eða utan.  

[Haraldur Hansson, 23.6.2009 kl. 16:58]

Takk báðir fyrir innlitið og athugasemdirnar.

Staða Grænlands er á vissan hátt hliðstæð því sem hér var fyrir rúmri öld, þó tæknin og nútíminn setji henni annan ramma. Þó velferðaþjónustan sé langt frá því sem við eigum að venjast held ég að líkurnar á umbótum séu margfalt meiri þegar Grænlendingar sjá um þróunina sjálfir. Ég hef fulla trú á að samfélagið muni færast til betri vegar á komandi árum, í öllu tilliti.