ESB: Þú fattar ekki eftirá!

Það er ljóst á fréttum dagsins að nauðasamningar um IceSave eru forsenda fyrir lánafyrirgreiðslu frá Norðurlöndunum, ólíkt því sem tveir norrænir ráðherrar sögðu í síðustu viku. Samningarnir tengjast einnig hinni ólæknandi ESB-veiru sem hrjáir Samfylkinguna, en forsætisráðherra gleðst yfir því að njóta stuðnings starfsbræðra sinna á hinum Norðurlöndunum í því máli.

En hvað viljum við? Það er stuðningur þjóðarinnar sem ræður úrslitum. Vill meirihluti Íslendinga virkilega ganga í ESB og vera þar til frambúðar?

  - þar sem þingkosningarnar eru grín, með 43% kjörsókn

  - þar sem kommissararnir eru ekki kjörnir af þegnunum

  - þar sem ókosnir sérfræðingar í 3.094 vinnuhópum móta farveginn

  - þar sem úrslit lýðræðislegra kosninga eru ekki tekin til greina

  - þar sem Ísland hefði 0,064% vægi

  - þar sem kjósendur eiga aldrei kost á að kjósa um stefnu

  - þar sem menn eins og Berlusconi eru í hópi þeirra valdamestu

  - þar sem Gordon Brown býður okkur velkomin

  - þar sem Eva Joly nær ekki að reka Barroso (því miður)

  - þar sem þeir stóru og sterku ráða, hvað sem skipuritið segir

  - þar sem valdið er fjarlægt og andlitslaust

  - þar sem lýðræði er ekki til

Nei takk, ekki ég.

Því miður virðist enginn áhugi meðal stjórnvalda að leggja í vandaða kynningu á Evrópusambandinu svo allir geti tekið upplýsta afstöðu. Ekkert frekar en að upplýsa þingmenn um innihald nauðasamningana um IceSave. Heldur skal sótt um undir því yfirskini að þetta séu "bara viðræður" og að við fáum að kjósa um samning seinna.

Ef við villumst inn í Evrópusambandið erum við komin til að vera. Til frambúðar. Þar sem aðrir en við sjálf ráða ferðinni í málum okkar. Þá verður ekki aftur snúið, sama hversu ósátt við erum. Þá dugir ekki að berja búsáhöld. Það er of seint að fatta eftirá.

Ekki ríkisábyrgð á leynisamning

Athugasemdir

[Helga (IP-tala skráð) 15.6.2009 kl. 21:52]

"Það er ljóst á fréttum dagsins að nauðasamningar um IceSave eru forsenda fyrir lánafyrirgreiðslu frá Norðurlöndunum, ólíkt því sem tveir norrænir ráðherrar sögðu í síðustu viku."

Það er rétt að taka þessa fullyrðingu með fyrirvara vegna þess að blaðamaðurinn getur þess ekki hver er heimildarmaðurinn.

Ef heimildarmaðurinn er íslenski forsætisráðherrann... ja, þá er það eins og annað sem frá henni hefur komið síðustu mánuði! Lítið mark á því takandi!

[Gunnlaugur Ingvarsson (IP-tala skráð) 16.6.2009 kl. 10:14]

Mjög góðir punktar hjá þér Haraldur.

Þessu þurfum við að halda hátt á loft í umræðunni og átökunum við ESB aðildarsinna.

Ég held að við ESB andstæðingar séum með mjög sterka málefnalega stöðu.

Aðildarsinnar óttast umræðuna og því eru þeir nú þegar byrjaðir að leggja það til að kosningar um ESB eigi nú að fara fram samhliða sveitarstjórnarkosningum á næsta ári. (Hallur Magg Mbl bloggari)

Við skulum vera vel á verði og aldrei leyfa að þessu stóra máli verði slætt svona með til að drepa umræðunni á dreif.

Ef og þá þegar kemur að því að þjóðin þurfi að taka afstöðu til aðildarsamnings við ESB verður sú kosning að vera sem mest án flokkapólitíkur og hún verður að vera eina málið og aðalmálið sem tekist verður á um.

Umræðan þarf að vera alveg skýr og fókusinn verður að vera sterkur á allar hliðar málsins. 

Þá vinnum við þær kosningar með glæsibrag.

[Tómas Ibsen Halldórsson, 16.6.2009 kl. 10:25]

Jóhanna Sigurðardóttir virðist halda að það sé heillvænlegra að fá stuðning forsætisráðherra hinna norðurlandana frekar en stuðning íslensku þjóðarinnar þegar kemur að spurningunni um hvort sækja beri um aðild að ESB eða ekki.

Ingibjörg Gísladóttir, þáverandi formaður Sandfylkingarinnar, lagði til að Sandfylkingin setti á stofn nefnd innan fylkingarinnar, er skilgreindi samningsmarkmið íslensku þjóðarinnar gagnvart Evrópusambandinu.  Þetta var fyrir kosningarnar 2002.  Í dag erum við jafn nær, Sandfylkingin hefur engin samningsmarkmið, fylkingin hefur enga Evrópusýn nema þá eina að ganga í ESB.  Sandfylkingin hefur aldrei getað upplýst þjóðina af hverju við ættum að sækja um aðild að ESB, hvað það er sem við hefðum út úr aðild né hverjir kostirnir væru umfram gallana.

Þegar ESB-sinnar halda því fram að þeir sem eru andstæðingar ESB-aðildar hafi enga skýra stefnu í Evrópumálum, þá eru þeir hinir sömu að snúa hlutunum á hvolf.  Við sem ekki viljum sækja um aðild að ESB höfum skýra stefnu í Evrópumálum, sú stefna er að halda okkur fyrir utan ESB þar sem hagsmunum okkar er ekki borgið innan samtakanna.  Það er ekkert flóknara en það.

[Sigurjón (IP-tala skráð) 16.6.2009 kl. 10:28]

ESB reddar öllu.....Hmmmm, eða hvað? Ég skil ekki alveg hvers vegna Samfylkingin er svona ólm að ganga þarna inn þar sem við verðum eins máttug og rykið undir sófa hjá mér og ég get ekki séð að nokkur maður hlusti á okkur eða taki nokkurt tillit til okkar eða skoðana okkar!

Nokkuð góður punktur hjá þér og ætti í raun að vera nokkuð góð mótrök gegn því að ganga þarna inn en Jóhanna og félagar virðast hreinlega ekki átta sig á því....Gordon Brown vill endilega hjálpa okkur inn og greiða fyrir inngöngu okkar! Hvaðan kom þessi manngæska hans allt í einu? Annað er með TÖFFARANN hann Berlusconi (ekki hægt að neita því að hann sé töffari), hann er hátt settur í valdaelítunni, það er nóg fyrir hann að vera töffari...hann þarf ekki að vera alveg svona valdamikill líka því það er e-h sem hann á til að misnota!

En eins og staðan er í dag.....um að gera að flýta sér sem mest og sækja um til að geta klúðrað þessu líka eins og öðru sem sem þessi "frábæra" ríkisstjórn okkar hefur framkvæmt upp á síðkastið (IceSave). Nei....hvers vegna þurfum við að ganga þarna inn og láta kúga okkur og segja okkur hvað við eigum að gera?? Erum við ekki sjálfstæð þjóð (vorum það amk) og eigum ekki að þurfa að hlusta á Þjóðverja, Breta eða nokkurn annan en okkur sjálf....en ætli ég láti þetta ekki nægja í bili, gæti sjálfsagt skrifað heila bók um það sem er að brjótast um í kollinum á mér núna en ég læt þetta duga svo einhver nenni nú að lesa þetta ;)

[Gunnlaugur Ingvarsson (IP-tala skráð) 16.6.2009 kl. 11:01]

Getur verið að það eigi að troða þessum ICESAVE þrælasamningi uppá okkur nú til þess að geta síðan tekið hann upp í ESB viðræðunum, þar sem Seðlabanki Evrópu baktryggi það sem útaf stendur að 7 árum liðnum.

Það væri "tær snilld" hjá þessu landráðaliði að koma þessu einhvernveginn þannig fyrir. Fyrst að hneppa okkur í ofurskuldafjötra og síðan fá svona einhverskonar afslátt - gegn ESB aðild.

Landráð en "tær snilld" 

[Haraldur Hansson, 16.6.2009 kl. 12:53]

Takk öll fyrir innlitið og athugasemdirnar.

Það er alltaf jarðvegur fyrir samsærishugmyndir í krísu. Veit ekki hvað skal segja um það sem Gunnlaugur nefnir í síðustu athugasemd, en fyrir nokkru ætlaði ég að skrifa færslu sem átti að heita "Hið ljóta ljóta leyndarmál" og reyna að finna skýringu á galskapnum. Fann bara engan trúverðuglegan flöt á málinu. Það er eins og ekkert fylgi reglum skynseminnar í pólitíkinni.

Hvað sem öðru líður, þá eru það skrýtin bjargráð sem byggjast á að Ísland verði kannski í ESB eftir þrjú ár og "fái" kannski evru eftir þrjátíu ár. Þau aumu villuljós eru merki um algjört úrræðaleysi.

[Haraldur Hansson, 16.6.2009 kl. 13:03]

Smá viðbót.

Af því ég nefndi galskapinn í pólitíkinni þá er þessi færsla Ólafs Eiríkssonar betra en sú sem ég ætlaði að skrifa en skrifaði ekki!

[Stefán Einarsson, 16.6.2009 kl. 15:55]

Umræðan um ESB og hvort að Ísland eigi að ganga í sambandið er að mínu mati mjög skrítin. Þær fullyrðingar sem að koma fram er því miður í flestum tilvikum ekki réttar eða dregnar úr samhengi. Þessi listi sem þú skrifar, Haraldur, er gott dæmi um slíkt. Aðalpunkturinn er þó kannski einmitt eins og þú segir stjórnvöld virðast einhverja hluta vegna ekki vera tilbúinn að kynna sambandið fyrir fólki svo að fólk geti myndað sér sjálfstæða skoðun því hvernig getur fólk verið á með eða móti einhverju sem það veit mjög lítið um?
Að sækja um aðild að ESB þýðir ekki að Ísland sé í ESB eftir að búið er að sækja um aðild. Það er mjög stór munur þar á. Norðmenn hafa oftar en einu sinni sótt um í ESB en á endanum hafnað samningum. Það að sækja um og hefja viðræður við ESB getur á engan hátt skaðað Íslendinga eða Ísland og hlýtur bara að vera að því góða því þá munum við (vonandi, fer auðvitað eftir vilja stjórnvalda) verða upplýst um það hvað er í boði og hvaða málamiðlanir eru nauðsynlegar og hvort að sá samningur sem að mögulegt er að gera sé ásættanlegur fyrir Íslendinga. Slíkar upplýsingar getum við ekki fengið öðruvísi en að fara í viðræður við ESB.
Þær fréttir um að kjörsókn hafi verið 43% er mjög villandi. Hér þar sem ég bý í Þýskalandi voru evrópukosningarnar hluti af sveitastjórnakosningum og nefndar kosningum, kjærsókn í sveitarstjórnakosningarnar í því sveitarfélagi sem að ég bý voru innan við 60% og í nefndarkosningarnar rétt yfir 25%. Það sem kom mér mest á óvart var að hér var engin flokkur virkilega að akitera fyrir evrópukosningunum, svo það kemur vart á óvart að kjósendur hafi ekki verið að velta því fyrir sér. Í evrópu er og hefur ekki verið mikil kjörsókn, að þessu leiti stendur Ísland nokkuð útúr og hefur líklegast mikið með þjóðfélagsaðstæður að gera.
Íslendingar verða að gera sér grein fyrir því að ESB leysir ekki okkar núverandi vandamál og skiptir engu hvort að við séum innan eða utan bandalagsins. Einhliða upptaka evru bætir heldur ekki ástandið. Fyrst þarf að byggja upp efnahaginn á Íslandi og það eru ekki til neinar skyndilausnir á því þó við Íslendingar virðumst ávalt leita að slíku. Ég veit ekki hvað vakir fyrir Samfylkingunni að fara inní ESB en ég rökréttasta skýringin sem ég sé, er að þeir vonist til þess að þar með takist þeim að bæta traust Íslands og íslenskra fyrirtækja og banka til að fá erlend lán og fjármagn. Þetta má sjá í þeim gjaldeyrishöftum og vaxtastigi sem er við líði á Íslandi í augnablikinu þó að slíkar aðgerðir væru mun erfiðari ef að við værum í ESB. Hvort að erlent fjármagn sé auðveldara að fá ef við erum innan ESB, veit ég ekki.
Ísland er smá þjóð og við erum háð öðrum þjóðum og ég held að hljóti að teljast eðlilegt að gera ráð fyrir því að við munum hafa samskipti við aðrar þjóðir (þó ekki væri nema til að fara bara í sumarfrí), slíkt þýðir að við munum þurfa að aðlaga okkur á einn eða annan hátt að þeim alþjóðasamningum, laga- og regluverki, sem og stöðlum sem að eru í gangi. Þar sem flest okkar viðskipti fara á einn eða annan hátt í gegnum ESB er eðlilegt að við munum þurfa að fara eftir þeirra ákvörðunum. Þar sem að við erum þegar í EES þá tökum við upp þau lög, reglur og staðla sem að ESB setur án þess að hafa eitthvað um það segja. Ég veit ekki hvort að Íslendingar geri sér grein fyrir því að EES samningurinn hefur átt einn stærstan þáttinn í velmeguninni á Íslandi síðustu árin.
Er ekki kominn tími til að Íslendingar vakni og uppgötvið það að við erum hluti af stærri heimi?

[Haukur Nikulásson, 16.6.2009 kl. 16:46]

Skemmtilegt framsetning á máli sem ég er sammála.