Hvenær er borgarafundur góður fundur?

Fundurinn í Háskólabíói var um margt góður. En það var líka sumt sem var ekki nógu gott. Ráðherrarnir komu mér á óvart að mæta svona margir en aðsókn almennings kom mér ekki á óvart. Smekkfullt út úr dyrum. Bókstaflega.

Það var augljóst að ráðherrum leið ekki vel að sitja þarna undir ræðum sumra frummælenda, en við því er ekkert að segja. Ástandið er skelfilegt og allt annað en einfalt að horfast í augu við það. Spurningarnar voru misgóðar og svörin líka.

Ef framhald á að vera á þessu þarf að bæta fundarstjórnina. Ég tek ofan fyrir Gunnari fyrir undirbúninginn og vinnuna sem hann hefur lagt í þetta. Það að gera þennan fund að veruleika og fá bæði ráðherra og þingmenn til að mæta er afrek. En hann er því miður ekki góður fundarstjóri.

Að mínum dómi er það ófrávíkjanleg krafa að skipt verði um stjórnendur í Seðlabankanum. Það er þeim málstað ekki til framdráttar ef fundarstjóri segir í hæðnistón "leyfum Davíð bara að tala og hættum að hlusta á hann. Látum hann bara vera þarna og tala og tala, það hlustar hvort sem er enginn." Fundarstjóri á ekki að láta eins og hann sé aðalnúmerið í eigin afmælisveislu. Þá er ekki líklegt að viðmælendurnir vilji mæta aftur.

Það kom spurning utan úr sal um hversu margar undirskriftir þyrfti til að fá fram þjóðaratkvæðagreiðslu. Það kom aldrei svar við þeirri spurningu. Ástæðuna tel ég slaka fundarstjórn þar sem skipulag var ekki nógu gott.

Ég vona að menn haldi samt áfram að boða til funda. Fyrir næsta fund þarf að læra af reynslu kvöldsins og gera betur næst. Fundarstjórn þarf að vera þannig að menn fái að svara þegar spurt er, eða eftir atvikum komist ekki undan því. Svo, sæmilegur fundur í kvöld og vonandi miklu betri næst.

 

Athugasemdir

[Indriði Haukur Þorláksson, 24.11.2008 kl. 22:43]

Sæll gamli félagi.

Raks á bloggið þitt núna og þakka málefnalega umfjöllun. Skil og styð mörg þeirra sjónarmiða sem fram koma hjá þér nú og í fyrri færslum.

Indriði

[Theódór Norðkvist, 24.11.2008 kl. 23:58]

Gunnar virkaði á mig eins og hinn dæmigerði Íslendingur. Maður sem drífur hlutina af, skipulagi kannski ábótavant, en hann kemur til dyranna eins og hann er klæddur og kann að gera að gamni sínu líka. Hann var ákveðinn við ráðherrana þegar hann taldi þess þurfa.

Knappur tími átti sinn þátt í að ekki var hægt að ganga eftir svörum við öllum spurningunum, en ég held að ráðherrunum hafi verið velgt ágætlega undir uggum.

Tek undir með Indriða.

[Haraldur Hansson, 25.11.2008 kl. 20:52]

Indriði: Takk fyrir innlitið, kommentið og þrjá góða pistla í nóvember.

Teddi: Sumt var gott og annað slæmt á fundinum. Hann átti að mínum dómi ekki að ganga út á að velgja ráðherrum undir uggum. Þeim var boðið sem viðmælendum. En Gunnar á skilið hrós fyrir drifkraftinn.

[Gunnar Sigurðsson (IP-tala skráð) 26.11.2008 kl. 11:04]

Elsku Haraldur.

Þú verður að rétta upp hendina og viðurkenna það að með uppdópuðum afskiptaleysishætti okkar hér á Íslandi létum við þessa stjórnmálastefnu ráða ríkjum. Enginn sagði eitt né neitt. Öllum var drullusama hverjir völdust á Alþingi til stýringar skútunni, opin prófkjör þar sem fólk er valið en ekki stefnur varð til þess að einstaklingar ofurseldu sig fyrirtækjum til að komast til valda og gjöf varð að gjalda. Enginn hafði áhuga á pólitísku afskipti...en þegar allt um hvolfdi þá rís almúginn upp og sakar þá er þeir sjálfir völdu um óheiðarleika og óheildindi. 

Það er ótrúlega göfugt hjá Borgarafundsfólki að koma saman og funda um ástand. Líkt og með mörgum þá er eitt að sjá viðbjóðinn í skúmaskotum en annað að taka til hendinni. Hver er stefnan hjá Borgarafundafólki...jú að krefjast að fólk fari...svo ef það hefst þá hvað...nú eru flokksfundir á hverri helgi hjá stjórnmálaflokkum..gott að fara að kíkja þangað og hætta að blaðra með endaþarmi og láta verkin tala. 

Takk fyrir erindið minn kæri Haraldur og ekki taka skrifum, "úrilla og hallærislegra manna sem reyna að vera fyndnir" sem persónulegri árás á skoðanir annarra. Rétt eins göfugt og það er að mæta á Borgarafundi og láta í sér heyra er hollt og gott að sjá báðar hliðar á pening áður en farið er að versla.

Þinn elskulegur...Síðuhaldari