Leggjum niður ferðamannaiðnaðinn

Þótt skaparinn hafi búið til karl úr leir og konu úr rifbeini höfum við mannfólkið ekki náð tökum á þeirri tækni. 

Iðngreinar eru margar og fjölbreyttar. Undir þjónustuiðnað og handiðn falla löggiltar iðngreinar sem krefjast náms og réttinda. Og svo eru verksmiðjurnar; iðnframleiðsla. 

Iðnaður - skipulögð (vélvædd) framleiðsla varnings úr hráefnum  segir orðabókin.

Við breytum ekki hráefni í fullunninn ferðamann eins og bakari breytir korni í brauð. Frankenstein bjó reyndar til einn, segir sagan, en sá fór hvorki til Kanarí né skoðaði Gullfoss.

Leggjum orðskrípið "ferðamannaiðnaður" niður fyrir fullt og fast.
Ferðaþjónusta er það og ferðaþjónusta skal það heita.

Athugasemdir

[JR (IP-tala skráð) 29.10.2011 kl. 01:16]

,,Iðngreinar eru margar og fjölbreyttar. Undir þjónustuiðnað og handiðn falla löggiltar iðngreinar sem krefjast náms og réttinda."

Þú er tekki að grínast ?

Hvar hefur þú orðið var við þetta undan farin ár ?

Ekki hefur þér dottið í hug að labba inn á eina verkfræðistofu í þessu landi og spurt þá hvort þeir hafi orðið varir við eitthvað af þessu sem þú nefnir ?

[Jón Steinar Ragnarsson, 29.10.2011 kl. 09:54]

Hún fellur þá semsagt undir þjónustuiðnaðinn?

Það er ekkertí orðinu Iðja, sem ekki á við ferðaþjónustu. Í þessu samhengi má jafnvel tala um ljóðagerð sem iðnað.

[Haraldur Hansson, 29.10.2011 kl. 13:32]

Þakka ykkur innlitið.

Það er ekkert í orðinu "iðja" sem ekki á við vinnu almennt. En það er orðið "iðnaður" sem ekki á við ferðaþjónustu.

Undir þjónustuiðnað falla t.d. gullsmiðir, úrsmiðir, klæðskerar, hárskerar og ljósmyndarar. Handiðn/handverk á við um málara, múrara, smiði, pípara o.s.frv.

Allt eru þetta löggiltar iðngreinar. Það er ekki til iðnaður þar sem menn framleiða túrista. En ferðaþjónusta er vaxandi grein og fjölþætt.

JR: Mér sýnist þú ekki skilja inntak færslunnar.

[Jón Steinar Ragnarsson, 29.10.2011 kl. 13:42]

Nenni nú varla að munnhöggvast um þetta, en ég fæ ekki séð að neinn sé að "framleiða" túrista hér.  Söluvaran í þessum "iðnaði" er landið og þjónustan í því. Auðlind, afurð eða hvað þú kýst að kalla það þarf ekki að vera bundið eitthvað eitt. Ég held að þú hafir bara allt of þrönga og persónulega skilgreiningu á orðinu iðnaður.

Er kvikmyndaiðnaður að framleiða áhorfendur t.d.?

[Úrsúla Jünemann, 29.10.2011 kl. 14:08]

Ég fer alltaf hroll þegar ég heyri orðið "ferðamannaiðnaður" þrátt fyrir að ég er ekki innfæddur íslendingur. Ég ímynda mér þá að það sé að framleiða eitthvað úr ferðamönnunum. Eru þeir kannski hakkaðir og búið til bollur úr þeim?

[Björn S. Stefánsson (IP-tala skráð) 30.10.2011 kl. 12:08]

Orðið ferðaútvegur nær betur yfir starfsemina en ferðaþjónusta.