Er þjóðin heimskari en Jónas?

"Þjóðin er heimsk" skrifar Jónas Kristjánsson, sem lengi hefur verið einn mest lesni bloggari landsins. Stíll hans er að skrifa stuttar færslur og vera bæði kjaftfor og ókurteis. Kannski er hann vinsæll einmitt þess vegna, það verður hver að fá að hafa sinn stíl.

Jónasi er tíðrætt um heimsku íslensku þjóðarinnar í færslum sínum. Hér eru nokkur dæmi um fyrirsagnir:

     >>  Heimsk þjóð á hrunverja skilið
     >>  Þjóðin er heimsk
     >>  Leti, heimska og siðleysi
     >>  Heimska fjöldans ræður

Oft tengjast heimsku-pistlar Jónasar skoðanakönnunum og kemst hann þá jafnan að þeirri niðurstöðu að "gullfiskaminni" hrjái landann ef niðurstaðan er honum ekki að skapi. Hann hefur líka dálæti á því að kalla menn "fávita" eða nota uppnefni. Stöku sinnum dettur hann niður í sandkassann með DV og talar um "náhirð", enda skyldleikinn nokkur.

Hér eru fáein dæmi um fávitafyrirsagnir Jónasar:

     >>  Fávitar eða lygarar
     >>  Fávitar gera landið óbyggilegt
     >>  Fávitar á ferli
     >>  Fjöldi fávita vanmetinn

En er þjóðin heimsk?

Gefum okkur að við hin séum ekki neitt mikið heimskari en Jónas og að íslenskir kjósendur séu að jafnaði bæði læsir og skrifandi. Þá getur verið fullgild ástæða fyrir því að Sjálfstæðisflokkur fái 35% í skoðanakönnun, þótt Jónas sjái ekki aðrar skýringar en heimsku og gullfiskaminni. Ég hef meiri trú á þjóðinni en það.

Kjósendur gætu talið flokkinn slæman kost en þrátt fyrir gallana gefið honum atkvæði, af því að hitt sem í boði er þykir enn vera. Dregið slíka ályktun eftir tveggja ára vinstristjórn, einmitt af því að þjóðin er ekki heimsk og hefur prýðilegt minni.

Jónas þessi er eflaust mætur karl og óvitlaus. Hvers vegna hann kýs að skrifa eins og forskrúfaður strigakjaftur sem kann ekki að skammast sín, veit ég ekki. En það er hans stíll. Kannski vegna þess að það virkar. Hann er jú á toppnum, enn eina vikuna.

Skrif Jónasar eru oft sóðaleg, sjaldan málefnaleg og aldrei uppbyggileg.

 

Athugasemdir

[Helga Kristjánsdóttir, 25.8.2011 kl. 00:39]

   Við erum þó eftir allt fallegust,mest og best,þrátt fyrir hann.

[Gunnar Heiðarsson, 25.8.2011 kl. 08:12]

Jónas verður að eiga sín skrif við sína samvisku, ef hann hefur hana þá.

Það er merkilegt hvað þessi maður hefur fengið að vaða uppi í gegn um árin. Á tíma var hann með fasta pistla í ríkisútvarpinu sem á þeim tíma var eini ljósvakamiðillinn. Lengi á eftir var hann síðan eins konar hirðmaður innan þeirrar stofnunar og leitað til umsagna hans um hin ýmsu mál. Enn er stundum tekið viðtal við manninn.

En hvað með hina meintu heimsku okkar hinna, sem Ísland búa og þá væntanlega gáfur Jónasar?

Hvað hefur ræst af þeim spám sem frá manninum hefur komið í gegn um tíðina?

Það er næsta lítið, flest af því sem þessi maður hefur fullyrt hefur ekki gengið eftir og því spurning um gáfnafar hans sjálfs.

Miðað við það hversu oft Jónas hefur haft rangt fyrir sér undanfarin nærri fjörutíu ár sem hann hefur verið að reyna að segja til um framtíð og meta fortíð, liggur beinast við að áætla að enn og aftur hafi hann rangt fyrir sér.

Að Íslendingar séu að öllu jöfnu alls ekki heimskir!

[Haraldur Hansson, 25.8.2011 kl. 23:30]

Þakka innlitið og athugasemdirnar.

Það verða allir að fá pláss fyrir sínar skoðanir, líka þeir sem kjósa að setja þær sóðalega fram.

Annars væri fróðlegt að rifja upp hvað Jónas skrifaði á sínum tíma um þá sem vildu gera jarðgöng undir Hvalfjörð. Það vantaði ekki gagnrýnina og stóru orðin, en göngin hafa heldur betur sannað sig, þvert á spár Jónasar.