€in mynt - €inn markaður

Bílaframleiðandinn Daimler AG gefur út tímarit sem heitir Mercedes-Benz Classic. Þetta er efnismikið 100 síðna blað í venjulegu tímaritsbroti. Sumir Benz eigendur fá þetta blað sent frítt en við hin eigum kost á að kaupa það. Efst á forsíðu er blaðið verðmerkt €6.50, sem gerir rétt rúmar þúsund krónur.

Fyrir neðan blaðhausinn koma svo sex verðmerkingar í viðbót með smærra letri:

       €6.50   Germany
       €7.60   BeNeLux
       €8.50   Italy
       €8.50   Spain
       €9.60   Finland
       €9.70   Greece

Grikkir, sem líklega fá fæstar evrur fyrir vinnu sína, þurf að greiða nærri 50% fleiri evrur en Þjóðverjar fyrir blaðið. Evran er greinilega ekki jafn verðmæt í öllum héruðum Evrulands og vinnuaflið ekki heldur.

Grein frá Íslandi
Í blaðinu er áhugaverð grein frá Íslandi, á bls. 78. Þar er rætt við Svein Þorsteinsson sem á gamlan eðal-Benz og greinin prýdd fallegum myndum frá Nesjavöllum, Þingvallavatni og víðar. Því miður rataði íslenska greinin ekki inn í vefútgáfu blaðsins. Áhugasamir þurfa því að verða sér úti um blaðið á 6, 7, 8, 9 eða 10 evrur, eftir atvikum.  

 

Athugasemdir

[Axel Jóhann Hallgrímsson, 15.5.2011 kl. 12:31]

Bráðsnjallt hjá þér. Með sömu rökum má segja að íslenska krónan sé ekki jafn verðmæt á Raufarhöfn og í Reykjavík, sé mið tekið af mismun á verðlagi. Mismunurinn hefur verið kallaður flutningskostnaður.

En flutningskostnaður er auðvitað ekki til í Evrópu.

[Haraldur Hansson, 15.5.2011 kl. 13:35]

Þakka þér innlitið Axel Jóhann.

Flutningskostnaður! Frá Stuttgart er helmingi styttra til Belgíu en Bremen. Og helmingi styttra til Mílanó en Hamborgar. Það er ekkert sérverð fyrir Frakkland.

Þú getur pantað blaðið í áskrift og þá þarftu að borga €1.30 í póstkostnað til Íslands. Að senda stök blöð merkt á nafn í pósti er miklu dýrara en almenn dreifing gegnum bókabúðir. Flutningskostnaður getur aldrei skýrt verðmun nema upp á innan við hálfa evru. Mesti verðmunurinn er 6-7 sinnum meiri en það. 

[Haraldur Hansson, 15.5.2011 kl. 13:39]

Veit ekki hvers vegna evrumerkið birtist sem spurningarmerki í athugasemdinni hér að ofan. Kannski táknrænt? Er sem sagt EUR 1.30 í póstkostnað.

[Axel Jóhann Hallgrímsson, 15.5.2011 kl. 17:13]

Það er einhver galli í kerfinu Haraldur, ýmis tákn, eins og gæsalappir og annað kemur fram sem spurningamerki, en hefur auðvitað ekkert með ESB að gera nema menn kjósi svo.

En þurfum við nokkuð að hafa áhyggjur af ESB, verður okkar umsókn ekki kolfelld í atkvæðagreiðslu, þegar þar að kemur?

[Jón Steinar Ragnarsson, 15.5.2011 kl. 19:00]

Er það ekki verðugt að minna á hvers vegna verður að kolfella hana Axel?

Maður getur ekki treyst skammtímaminni Íslendinga. Það er fullreynt. Á hverjum degi dynur áróður úr helstu fjölmiðlum um ágæti ESB á grunlausu fólki sem hefur lítil ráð með að leita hins sanna í fullyrðingunum.

Þörf áminning Haraldur og takk fyrir að standa vaktina.

[Einar Steinsson, 15.5.2011 kl. 19:23]

Það kann að koma þeim á óvart sem halda að ESB sé alsráðandi í aðildarlöndum en skattlagning, t.d. virðisaukaskattur á svona tímariti er mismunandi eftir löndum og það er ein af skýringunum.

Eigendur bensínstöðva i Austurrí­ki sem sem eru stutt frá landamærunum að Þýskalandi græða á tá og fingri vegna þess að þjóðverjar koma yfir landamærin til að kaupa ódyrara bensí­n í Austurríki, Austurríkismenn þurfa hins vegar að greiða hærra verð fyrir bílana sjálfa. Allt spurning um skattlagningu.

Verðlag hefur aldri verið það sama í öllum evrulöndum og verður það varla í bráð, það er jafnvel mismunandi milli svæða innan sama lands.

Hvað  evrumerkið birtist ekki í athugasemdunum þá er eitthvað skritið í gangi með stafasettið þá þessum netþjón, villupúkinn birtir til dæmis íslensku stafina rangt.

[Haraldur Hansson, 15.5.2011 kl. 21:52]

Þakka innlitið og athugasemdirnar.

Virðisaukaskattur á tímarit er 7% í Þýskalandi en á Spáni og Ítalíu er hann 4%. Verðmunurinn hefur því ekkert með vsk að gera. Það er einfaldlega sitt hvað, grísk evra og þýsk.

[Gunnar Rögnvaldsson, 15.5.2011 kl. 23:21]

Takk fyrir Haraldur

Vaxtakostnaður ríkissjóðs Grikklands á tveggja ára lánum er 26 prósent. En hann er einungis 1,78 prósent ef um ríkissjóð Þýskalands er að ræða. Þetta eru "Evrópuvextir" Össurar Skarpa.

Takið eftir: 26 prósent og 1,78 prósent: Mismunur; eitt þúsund þrjú hundruð og sextíu prósent; eða; 24,22 prósentu stig. Ein mynt - einn markaður? Eða er þetta einn peningur og eitt gjaldþrot, kannski sameiginlegt?

Eins og þið vitið er það vaxtakostnaður ríkissjóðs sem myndar grunninn fyrir vaxtamyndun bankakerfa ESB-landa.