Árinu bjargað á þriðja degi

Næst því að sjá Leeds United vinna er mönnum fátt hollara en að sjá Manchester United tapa. Í dag sáum við Langflottasta lið í heimi slá Manchester United út úr FA Cup og það á Old Trafford. Betra getur það ekki orðið.

Þetta er í fyrsta sinn sem Sir Alex fellur úr keppni í 3. umferð FA Cup, sem er elsta bikarkeppni í heimi. Tapaði á heimavelli fyrir framan 75 þús manns fyrir liði sem er tveimur deildum neðar. En þessi fyrsti sigur Leeds á Old Trafford í 29 ár var enginn heppnissigur.

Leeds United spilaði ekki eitt einasta augnablik sem minni máttar, heldur mætti heimamönnum sem þeir væru jafningjar, þrátt fyrir að einn varamaður Man. Utd. sé dýrari en allt Leeds liðið samanlagt. Leeds átti þrjú af fjórum bestu færunum í leiknum og vann verðskuldað.

Meira en hálftíma eftir leikslok eru stuðningsmenn Leeds enn á vellinum og heyrast syngja í bakgrunni meðan menn kryfja leikinn í stúdíói MUTV. Þar tala menn um að skipta um stjóra, selja menn og kaupa nýja. Við Leedsarar erum sáttir við Simon Grayson og vitum að hann mun stýra liðinu upp um deild í vor. Árið gat ekki byrjað betur.

 

Leeds sló Manchester United út úr bikarnum

Athugasemdir

[Ævar Rafn Kjartansson, 3.1.2010 kl. 15:57]

Þetta er frábært fyrir okkur.

[Kristinn Rúnar Karlsson, 3.1.2010 kl. 16:42]

Ég er grjótharður ManU maður síðan '68 er George Best var hjá oss, og held enn með liði mínu! Ég óska Leeds mönnum innilega til hamingju með þennan sigur!, sá ekki leikinn, but what the hell; það hefur alltaf slegið lítið Leeds hjarta í mér og segi enn og aftur til hamingju drengir! Ég þekki nokkra Leeds-ara og þeir standa alltaf með sínu liði og það ber að virða þó illa hafi gengið hin undanfarin misseri. Vona að við sjáum ykkur senn í efstu deild, því þar eigið þið heima!

kveðja frá Utd manni

[Jón Þór Helgason, 4.1.2010 kl. 22:00]

Sæll Haraldur,

Svona til að byrja með, gleðilegt ár og takk fyrir það gamla.

Og innilega til hamingju þína menn. Mér sem Liverpool aðdáandanda fannst þetta ekki leiðinlegt.

 kv.

Jón Þór

[Haraldur Hansson, 5.1.2010 kl. 12:54]

Þakka ykkur innlitið og athugasemdirnar.

Gaman að fá komment frá einum Man. Utd manni, einu Púllarar og svo einum sem heldur með Langflottasta liðið í heimi eins og ég.

Það er mjög sérstakt að sjá loksins Leeds United leggja undir sig forsíðurnar hjá mörgum erlendum fréttamiðlum og fá mikið pláss hjá þeim innlendu. Ég vona bara að lið okkar allra eigi eftir að leika í sömu deild innan fárra ára. Þetta er orðin allt of löng dvöl í neðri deildunum.

Jón Þór; takk sömuleiðis.