EKKERT = kr. 326.530 milljónir

Auðvitað þarf að ljúka þessu Icesave máli, en það er ekki sama hvernig það er gert. Í gær kom frétt um að eignir Landsbankans dygðu fyrir 90% af forgangskröfum og að líklega myndu "aðeins 75 milljarðar" falla á ríkissjóð.

Svona málflutningur er, eins og ágætur maður orðaði það, að setja varalit á svínið til að gera það kyssilegra.

Með sömu röksemdafærslu þarf ríkissjóður ekkert að greiða ef eignir Landsbankans duga fyrir öllum forgangskröfum, 100%. En það er ekki svo.

Ef við þurfum "ekkert" að greiða verður reikningurinn aðeins 326,5 milljarðar. Já, aðeins 326.530 milljónir króna. Lánin, sem Bretar og Hollendingar vilja ríkisábyrgð á, bera 5,5% vexti, sem þessa dagana gerir um 100 milljónir á dag. Þau gufa ekki upp þótt varaliturinn sé dreginn fram.

Þetta gerir 34 til 47 milljarða á ári í átta ár. Það er nú allt núllið. **

Gangi draumaspá ríkisstjórnarinnar eftir, þannig að 90% höfuðstólsins greiðist með eignum Landsbankans, verður reikningurinn ekki minni en 405 milljarðar, sem er býsna mikið meira en 75 milljarðar. Það verður fróðlegt að sjá skýringarnar á nýju mati á eignum Landsbankans, sem nú er óvænt komið í 90% en var 83% í júní.

Það hlýtur að koma - mottóið er jú að allt eigi að vera uppi á borðum.

---------- ---------- ----------

** Í þessum útreikningi er miðað við að eignir mjatlist inn á höfuðstólin á sjö árum, mest í lok tímans. Og að fallist verði á nauðsamningana við Breta og Hollendinga. Einnig er miðað við gengi 5. júní, daginn sem nauðasamningarnir voru undirritaðir. Sé miðað við gengið í dag hækkar reikningurinn um litla 20 milljarða. Ekki er tekinn með annar kostnaður vegna uppgjörs gamla og nýja LÍ.

 

Málin að komast á lokastig

Athugasemdir

[Landið (IP-tala skráð) 13.10.2009 kl. 13:20]

Ef ég skildi þetta rétt þá ætlar ríkistjórnin að láta Nýja Landsbankan gefa út skuldabréf upp á 260 milljarða til tíu ára til gamla Landasbankans og þar með er búið að auka eignir þess gamla um þá upphæð. Fréttablaðið setti þetta upp á forsíðu og blaðamanninum var líklega skipað að setja þetta eins ruglingslega upp og hægt er svo fólk átti sig örugglega ekki á þessu.

[allial, 13.10.2009 kl. 17:03]

Var að reyna skilja þessa frétt. Hún er eins sett fram í öllum fjölmiðlum sem ég hef séð.

Af fréttinni mætti einmitt ætla við þurfum "bara" að borga 75milljarða.

Spurningin er:  erum við með svona lélega fjölmiðla eða eru þeir þáttakendur í því að blekkja fólk? 

[Haraldur Hansson, 13.10.2009 kl. 17:58]

Takk fyrir innlitið og athugasemdirnar.

Formaður skilanefndar LÍ segir að heildargreiðslan verði 305 milljarðar, það kemur fram í frétt á RÚV (hér).

Til þess að það gangi upp þurfa eignir gamla LÍ að seljast hratt og vel, svo höfuðstóll lækki um tæpan helming á tveimur árum. Steingrímur Joð reiknar með röskri sölu, samkvæmt ummælum á þingi í dag (hér).

Því miður deili ég ekki þessari bjartsýni með þeim og væri tilbúinn að veðja vænni summu á að greiðslan fari vel yfir 400 milljarða, miðað við að aðrar forsendur standi óbreyttar. Vextirnir vega það þungt í þessu.

[Guðmundur Ásgeirsson, 13.10.2009 kl. 18:04]

"Landið" er með þetta á hreinu. Það er verið að tryggja heimtur af eignasafni gamla Landsbankans með því að skuldsetja þann nýja (NBI hf.) gagvart skilanefndinni fyrir alt að 250 milljarða. Jafnvel þó það muni hafa einhver jákvæð áhrif á niðurstöðuna í IceSave, þá þýðir það samt að á endanum er það ríkissjóður sem borgar óbeint af rekstrartekjum ríkisbankans NBI hf á næstu 10 árum. Meira um þetta í nýjasta pistli mínum, Flugeldahagfræði: hvernig á að fela 250 milljarða.

[Victor Ingi (IP-tala skráð) 14.10.2009 kl. 10:19]

Skemmtileg grein... gott að sjá að einhverjir séu að hugsa aðeins á þessu fróni en ekki bara gleypa bullið frá stjórnmálamönnunum og vinum þeirra á fréttastöðvunum...

[Benedikt Gunnar Ófeigsson, 14.10.2009 kl. 10:23]

Sæll Haraldur. þinn útreikningur er líklega skynsamlegri heldur en það sem stjórnvöld bjóða okkur upp á en aðal málið er að allar stærðir eru svo óvissar að það munurinn á hæsta og lægsta mögulega kostnaði er 6 eða 7 faldur. það er ekki hægt að bjóða fólki upp á þessa vitleysu.

Þessi umræða væri fyndin ef málið væri ekki svona alvarlegt. Það er ekki nóg með að þessi 90 % séu nánast hrein ágiskun heldur skiptir öllu máli hvernig og hvenær þessar eignir innheimtast, svo kemur gengisáhætta líka inn. ég gerði ráð fyrir genginu eins og það var í dag og reiknaði  kostnaðinn miðað við að allar eignir kæmu inn í einu, ekki raunhæft (Þinn útreikningur líklega raunhæfari svo langt sem það nær), en það gefur mynd af þvi hversu mikið bil kostaðurinn getur spannað. Ef allar eignir landsbankans koma inn fyrir 5. júni 2010 verður kostnaðurinn 206 milljarðar ef þær koma allar inn eftir 7 ár verður hann um 460 milljarðar, ef ekkert kemur inn fyrr en að lánstíma loknum kostar þetta um 630 milljarða. Ef hins vegar við fáum ekkert fyrir Landsbankan verður kostaðurinn 1240 milljarðar.

[Haraldur Hansson, 14.10.2009 kl. 12:27]

Takk allir fyrir innlitið og athugasemdirnar.

Guðmundur; eins og fram kemur neðanmáls í færslunni er kostnaður skattgreiðenda við uppgjör gamla og nýja LÍ ekki tekinn með, svo takk fyrir þína færslu.

Victor, sem betur fer eru fleiri en einn og fleiri en tveir sem nenna að rýna í þetta. Stundum er eins og menn átti sig ekki á hvílíkar klyfjar stendur til að leggja á komandi kynslóðir.

Benedikt, ég prófaði bjartsýnisforsendur (sem ég ætla að birta í næstu færslu) til að koma 90% reikningnum niður í það sem Lárentsínus í LÍ reiknar með. Það þarf að fara út fyrir bjartsýnismörk að mínu mati til að ná því. Hér er greinilega verið að selja þjóðinni "létta lausn" í þeirri trú að allir séu orðnir hundleiðir á þessu og vilji losna við IceSave sem fyrst.

[Haraldur Hansson, 14.10.2009 kl. 13:03]

Benedikt, tilraun með bjarsýni endaði sem þarnæsta færsla ... hér.