Brotlent í Brussel

Utanríkisráðherra Hollands hefur tekið af allan vafa (hér) um að IceSave samningarnir og ESB umsókn eru mál sem hanga saman. Og það kyrfilega. Engu skiptir hversu ákaft Össur og Steingrímur mótmæla, staðreyndirnar blasa við.

Nú væri hollt að líta framhjá því, eitt augnablik, hvort menn eru með eða á móti því að Ísland sæki um aðild að ESB. Skoða málin í réttu ESB/IceSave samhengi.

Viðbrögð hollenska ráðherrans undirstrika hvílík mistök það voru að samþykkja aðildarumsókn án þess að ljúka IceSave deilunni fyrst. Þar brást þingið þjóðinni illilega með því að setja hlutina ekki í rétta forgangsröð.

Vilji ESB til að fá Ísland í klúbbinn er augljós, eins og fram kemur í umsöng Carls Bildt (hér). Það hefði átt að vera tromp á hendi Íslendinga. Bildt sér hag ESB í "aðkomu þess að norðurskautssvæðinu" en nefnir hagsmuni Íslendinga ekki einu orði. Með gjörningnum á Alþingi 16. júlí henti þingið trompinu frá sér.

Öflugasti bandamaður Breta og Hollendinga í IceSave deilunni er Samfylkingin. Hinn einlægi ásetningur hennar, að skríða til Brussel með bundið fyrir augun, hefur gert okkar tromp að þeirra. Þeim var fært það á silfurfati.

Svo er það rúsínan í pylsuendanum.

Til að fullkomna hringlandaháttinn segist Ögmundur Jónasson núna aðeins vilja hugsa um þjóðarhag (hér). Hann hefði átt að byrja á því fyrr, áður en hann sagði já við ESB umsókn á fimmtudaginn.

 

Össur er lagður af stað til Stokkhólms. Hann veit að Icelandair ætlar að bjóða upp á beint flug til Brussel fljótlega. Flugtíminn þangað, aðra leiðina, er ekki ýkja langur. Ef allt gengur að óskum krata, mun íslenska þjóðin brotlenda í Brussel um klukkan 20:12 að staðartíma.

 

Ræðir við Bildt um ESB umsókn

Athugasemdir

[Tómas Ibsen Halldórsson, 22.7.2009 kl. 12:33]

Guð hjálpi okkur ! ! !   Hvenær er næsta flug til Kanada ? ? ?

[Bjarni (IP-tala skráð) 22.7.2009 kl. 13:10]

Ég held að þetta sé röng greining hjá þér. Það þarf með einhverjum hætti að ganga frá IceSave málinu a.m.k. fyrir septemberlok ef ekki fyrr. Umsóknarferlið er rétt hafið það á erfitt að taka mörg misseri.   

Ef Alþingi samþykkir ekki ábyrgðina getur málið orðið að erfiðri milliríkjadeilu og þá skiptir engu máli hvaða viðbrögð umsóknin fær í Evrópu, aðild verður aldrei samþykkt hér heima.

[Haraldur Baldursson, 22.7.2009 kl. 19:27]

Æææææ...tökum bara slaginn höfnum þessu samkomulagi.....semjum svo aftur, en gefum Svavari frí í það skiptið og köllum til þjálfaða samningamenn. Færni í kokteilræðum þarf ekki að vera áskilin.

[Jón Valur Jensson, 23.7.2009 kl. 00:54]

Vel skrifuð grein sem endar þó í hryllingi.

Áfram Ísland, ekkert ESB!

[Páll Blöndal, 23.7.2009 kl. 01:10]

Ofdekraðir ESB andstæðingar á moggablogginu
http://pallblondal.blog.is/blog/pallblondal/entry/918743/

[Andri Geir Arinbjarnarson, 23.7.2009 kl. 08:40]

Sammála.  Tímasetningin var afleit og í anda samningsins.  Hin rétta tímasetning var að sækja um ESB aðild strax í október áður en við sögðum okkur á sveit hjá IMF.

[Haraldur Hansson, 23.7.2009 kl. 09:26]

Takk allir fyrir innlitið og athugasemdirnar.

Andri Geir: Fimmtudaginn 16. júlí 2009 var orðið of seint að sækja um ESB aðild í október 2008. En þá var ekki of seint eða setja hlutina í rétta röð og fresta afgreiðslu tillögunnar þar til kominn væri botn í IceSave málið. Umsóknin verður hvort sem er ekki tekin fyrir fyrr en í desember.

[Haraldur Hansson, 23.7.2009 kl. 09:30]

Páll: Eins og þú veist eru bloggskrif létt á metunum í samanburði við almenna fjölmiðlaumfjöllun; blaðagreinar og sjónvarpsþætti.

Væri fróðlegt ef þú ættir sams konar samanburð um aðgengi manna að blöðunum eftir því hvar þeir standa í ESB málum. T.d. fastapennar á Fréttablaðinu, eða hverjir fá helst að birta greinar á besta stað og yfir stærðarmörkum í Morgunblaðinu.

Svo væri líka fróðlegt að skoða lista yfir viðmælendur í Silfri Egils, flokkaða eftir ESB skoðunum. Það er helsti þjóðmálaþátturinn á RÚV, sem starfar eftir hlutleysisreglum.

Fréttaflutningur ljósvakamiðlanna allra er svo áhugavert skoðunarefni. Það er aldeilis engin hætta á því að það halli á aðildarsinna í umfjöllun íslenskra fjölmiðla.

[Andri Geir Arinbjarnarson, 23.7.2009 kl. 10:05]

Haraldur,

Málið er að við erum afleit í að skipuleggja fram í tímann.  Við lifum alltaf í núinu.  Það voru margir, þar á meðal Þorvaldur Gylfason sem strax í byrjun október kölluðu á ESB aðild.  Margir sáu strax í hvað stefndi en því miður eru Íslendingar oft eins og taflmenn sem aðeins hugsa einn leik fram í tímann ef það þá.  

Hver er framtíðarsýn fyrir landið 2020 fyrir þessa 4 möguleika:

1. Í ESB og Icesave samþykkt
2. Utan ESB og Icesave samþykkt
3. Í ESB og Icesave fellt
4. Utan ESB og Icesave fellt

Hver af þessum möguleikum er líklegastur til að skila okkur hæstum meðaltekjum á mann 2020?

[Haraldur Hansson, 23.7.2009 kl. 12:27]

Sæll aftur Andri Geir

Þetta IceSave mál er ekki svo svart-hvítt að aðeins sé boðið upp á kostina fellt og samþykkt. Millileiðin er að samþykkja IceSave með fyrirvörum.

Með því er samningunum vissulega hafnað, tæknilega, en það er þá gert á diplómatískan hátt og af kurteisi. Í því felast skilaboð um að vilja ræða málin frekar, standa við skuldbindingar að lögum og finna lausn sem viðsemjendur okkar geta fellt sig við og Íslendingar staðið undir. Í þeirri stöðu er það siðaðra manna háttur að leita lausna.

Óttinn við harkaleg viðbrögð, einangrun og jafnvel refsiaðgerðir, getur ekki átt við rök að styðjast. Vestræn, siðmenntuð réttarríki beita ekki þannig úrræðum í máli sem þessu. Fyrir Breta er þetta meira um prinsipp en peninga, enda aðeins smáaurar á þeirra mælikvarða (jafngildir því að við ættum útstandandi 1,8 milljarða). Það væri annað mál ef við værum að framleiða efnavopn.

Telji stjórnmálamenn, í fullri alvöru, ástæðu til að óttast viðbrögð Hollendinga, Breta og ESB þá er eitthvað virkilega ljótt í trúnaðarskjölunum sem haldið er frá almenningi. Við hljótum að ganga útfrá að svo sé ekki og að viðsemjendur okkar séu að leita réttlátra lausna en ekki hefnda.

En til að svara spurningu þinni allri: Hver sem niðurstaðan verður í IcaSave þá er það grundvallaratriði þegar horft er til ársins 2020 að Ísland standi áfram utan ESB.

[Andri Geir Arinbjarnarson, 23.7.2009 kl. 19:36]

Haraldur,

Ég er sammála þér að því meir sem maður fær að vita um þennan samning þá er varla hægt annað en að samþykkja hann með fyrirvörum.  Þetta er þvílík hrákasmíð að maður gæti haldið að þetta væri komið upp úr kjallara gamla Landsbankans.

En þeir fyrirvarar sem við setjum verða að vera útfærðir í samvinnu við helstu fagmenn.  Ég er ansi hræddur um að Alþingi passi sig ekki nógu vel og að Bretar og Hollendingar tæti þessa fyrirvara í sundur og skilji okkur eftir í enn einni klúðurssúpunni.

[Haraldur Baldursson, 23.7.2009 kl. 20:04]

Samninganefnd breta og hollendinag hlýtur stundum að átt það erfitt að hlægja ekki að því sem þeir sáu hinu megin við borðið.

[Andri Geir Arinbjarnarson, 24.7.2009 kl. 11:33]

Einmitt,

Það var sagt að við gætum ekki keypt okkur sérfræðiþekkingu af því að hún væri svo dýr og nú þyrfti að spara.  Bretar hafa hugsað með sér:

"When you pay peanuts you get monkeys"