Þráinn skorar sjálfsmark!

Stundum skiptir ekki aðeins máli hvað er sagt heldur líka hvernig það er sagt.

Ef Þráinn Bertelsson styður tillögu Samfylkingarinnar er hann að skora klaufalegt sjálfsmark; ganga þvert gegn því sem Borgarahreyfingin stendur fyrir. Brjóta prinsippið. Hún var stofnuð sem andóf gegn gömlu valdaklíkunni og sem krafa um aukið lýðræði og öflugra Alþingi. Skilgetið afkvæmi búsáhaldabyltingarinnar.

Málatilbúnaður Samfylkingarinnar brýtur gegn öllu sem Borgarahreyfingin átti að standa fyrir.

Eftir kosningar knúði Samfylkingin fram málamiðlun við VG um að leggja fram þingsályktun um ESB umsókn og "fela Alþingi að taka ákvörðun". Núna skal tillagan samþykkt undir hótunum um stjórnarslit. Framkvæmdavaldið segir kjörnum fulltrúum á löggjafarþinginu fyrir verkum. Ekki er það til að efla Alþingi eða auka virðingu þess. Þetta er það sem Borgarahreyfingin vildi burt og fá gagnsæi og heiðarleika í staðinn.  

Vissulega vill Þráinn standa við það loforð að leyfa þjóðinni að ráða. Það er bara ekki sama hvernig það er gert. Það væri miklu nær að spyrja þjóðina álits, sem líka er í samræmi við kjörorð Borgarahreyfingarinnar um "þjóðina á þing".

Nema auðvitað að menn hafi ekki verið að meina neitt með tali sínu um Nýja Ísland. Þá hjakka menn bara áfram í gamla farinu. Borgarahreyfingin líka.

Athugasemdir

[Gunnar (IP-tala skráð) 15.7.2009 kl. 17:15]

Mér skildist á Þráni að hann ætlaði að styðja frumvarpið vegna þess að það hafi verið í samræmi við yfirlýsingar hans fyrir kosningar. Fyrir kosningar sagði Þór Saari líka að tvöföld atkvæðagreiðsla væri tómt bull. Ef það er orðið viðurkennt prinsip í pólitík að segja eitt fyrir kosningar og gera annað eftir þær, þá er Þráinn greinilega að brjóta prinsipin, en mér segist svo hugur að það prinsip sé nú ekki viðurkennt af öllum -- og kannski að Þráinn fylgi því prinsipi að standa við orð sín.

[Haraldur Hansson, 15.7.2009 kl. 17:43]

Takk fyrir innlitið og athugasemdina Gunnar.

Auðvitað á að standa við gefin loforð, það er bara ekki sama hvernig það er gert. Um það fjallar færslan. Ef leiðin að markinu, sem nú er boðið uppá, brýtur gegn því sem Borgarahreyfingin stendur fyrir, þarf að finna aðra leið.

[Gunnar (IP-tala skráð) 15.7.2009 kl. 20:11]

Auðvitað hljóta stjórnmálamenn að taka tillit til breyttra aðstæðna, en ég sé ekki að aðstæðrur hafi breyst mikið að undanförn frá kosningum. Þeir sem eru á móti ESB hafa fulla ástæðu til að vera það áfram, og þeir sem eru með sömuleiðis. Þannig að þetta er sennilega bara óskhyggja þeirra sem líkaði ekki afstaða Borgarahreyfingarinnar frá byrjun, en þá áttu þeir heldur ekki að kjósa þá.