Að bera saman epli og skrúfjárn

Það er nokkuð ljóst að fiskveiðar og yfirráð yfir auðlindum hafsins við Ísland, verður eitt af stóru málunum í Evrópuumræðunni sem framundan er.

Sérstaða Íslands í þessum málum er veruleg. Í flestum löndum Evrópusambandsins er sjávarútvegur mjög léttvægur og nýtur opinberra styrkja. Á Íslandi er þessi atvinnugrein meginstoð sem þarf að reka á arðbæran hátt til framtíðar. Vægi hennar hefur aukist við hrun bankanna.

Hvort sem menn eru með aðild að Evrópusambandinu eða á móti, þá er klárt að ef til samninga kæmi yrði sá hluti sem fjallar um fiskveiðar að stórum hluta nýsmíði. Stefnan er ekki sniðin að þeim aðstæðum sem hér ríkja og varla hægt að nefna fordæmi til að fara eftir.

Nýlega var talað um Möltu sem hliðstæðu, sem ekki er raunhæft. Einn, annars aldeilis ágætur Framsóknarmaður, benti á Azoreyjar og Kanaríeyjar. Sá samanburður er ekki raunhæfur heldur þar sem báðir þessir staðir falla undir "útnára-undanþáguna" í 349. grein Rómarsáttmálans. Að bera Ísland saman við þessa staði er eins og að bera saman epli og skrúfjárn.

Samningur yrði því mjög flókið verk og þarf að huga að hverju smáatriði. Þar að auki hefur sú stjórn sem nú situr ekki umboð til slíkra viðræðna svo af þeim getur ekki orðið fyrr en nýtt þing hefur verið kosið og ný stjórn tekið við.

Fyrir fróðleiksfúsa, þá læt ég fyrri hluta 349. gr. fylgja:

Taking account of the structural social and economic situation of Guadeloupe, French Guiana, Martinique, RéUnion, Saint-Barthelemy, Saint-Martin, the Azores, Madeira and the Canary Islands, which is ompounded by their remoteness, insularity, small size, difficult topography and climate, economic dependence on a few products, the permanence and combination of which severely restrain their development ...

(Grálituðu nöfnin eru ekki inni í greininni eins og er en stendur til að bæta þeim við.)

ESB myndi stjórna hafsvæðinu

Athugasemdir

[Sveinn hinn Ungi (IP-tala skráð) 11.1.2009 kl. 22:26]

Tenerife er með 865.000 íbúa og  Grand Canarí er með 815.000 íbúa.

Miklu fjölmennari en Ísland hvor um sig.

Ég sé ekkert að því að vera í hópi með þessum eyjum.

[Haraldur Hansson, 11.1.2009 kl. 22:54]

Það er ekki bara íbúatala sem skiptir máli heldur margir þættir. Ísland er sjálfstætt ríki og þróunar- og efnahagsstig hér annað (þrátt fyrir tímabundna kreppu).´

Sérfræðingur á sviði sjávarútvegsmála hjá Framkvæmdastjórn ESB telur þetta ekki geta átt við um Ísland. Hins vegar er spurning hvort 158. greina stofnsáttmála ESB gætu átt við um íslenskan landbúnað, en þar eru ákvæði um harðbýl svæði og eyjar.

[Ragnar Eiríksson, 11.1.2009 kl. 23:08]

Sveinn,

Skila þessi eylönd svipuðu fiskmagni og Ísland gerir?   Er velmegun þar á svipuðu stigi og hér?    Eru þau orkurík eins og Ísland?    Ég held að svarið við öllum spurningunum sé nei og því komumst við ekkert í "útnárahópinn" alveg burtséð frá fólksfjölda - þau eru stór gettóin þarna og fáir þar sem róa til fiskjar!

Ragnar    

[Sveinn hinn Ungi (IP-tala skráð) 12.1.2009 kl. 00:26]

Það eru nánast jafn margir sem vinna við fiskveiðar og hér. Laun eru svipuð og hér, sérstaklega eftir fall krónunnar og kaupmáttur er svipaður.

Getum við eingöngu flokkast í hóp með ríkjum sem eru að öllu leiti eins og við? Slíkt ríki finnst að sjálfsögðu ekki, það er ekkert ríki svipað.

Auðvitað er Ísland jaðarríki, hverslags vitleysis umræða er þetta eiginlega?

[Fannar frá Rifi, 12.1.2009 kl. 00:40]

sérstækt fiskveiðikerfi í kringum Möltu sem margir vitna í, er á við eina trillu á Íslandi. rétt í kringum 1300 til 1400 tonn. á meðan er meðal veiði Íslendinga á árunum 2003 til 2007 1,6 milljón tonn. meir en þúsund sinnum meira heldur en Malta. þannig að allur samanburður þarna á milli er vita gagnlaus.