Ljósaperuráðherra ESB

Olli Rehn segir að Ísland geti keppt um að verða 28. ríki ESB, eins og hann sé að tala um íþróttamót. Þetta sagði hann í gegnum gervihnött við fólk í HR í morgun. Við vorum ánægð með silfrið á OL í handbolta og ég væri ekkert ósáttur við að koma á eftir Króötum í mark í þessari "keppni".

Rehn segir líka að "á næstu árum" verði fiskveiðistefna ESB endurskoðuð, sem er hið besta mál. Ekki kom fram hvort átt væri við framseljanlegar veiðiheimildir. Verst er að hann fær ennþá martraðir þegar hann hugsar um kreppuna í Finnlandi. Karl anginn.

Bara að við Íslendingar fáum ekki martraðir. Þá er ég ekki að hugsa um ESB, heldur hitt, að á meðan sú umræða fær jafn mikla athygli og raun ber vitni er verið að gefa í nýtt spil: "Útrásarvíkingarnir - part two". Fyrsti hluti þess heitir Exista, Noa Noa og Next.

Í tíufréttum RÚV í gærkvöldi var skemmtileg frétt um starfið í ESB. Sænsk kona dásamaði spar-perur. Hún upplýsti að nú væru í smíðum nýjar reglur um notkun á ljósaperum í ESB. Strax á næsta ári verður bannað að selja 100 watta perur til heimabrúks.

Ef við göngum í ESB legg ég til að við sækjumst eftir embætti ljósaperuráðherra. Sækjum líka fast að fá fulltrúa í nefndinni sem vinnur að smíði reglugerðar um hávaðmengun frá vélknúnum garðsláttuvélum.

Ísland gæti keppt um að verða 28. ríki ESB

Athugasemdir

[Loftur Altice Þorsteinsson, 10.12.2008 kl. 11:39]

ESB heldur, að nú sé bara eftir að draga þorskinn Ísland á land, en það skal ekki verða. Menn ættu að kynna sér hvernig Liðhlaupanum frá Arkansas - Bill Lewinski Carter, með hjálp IMF tókst að flæma frá völdum Suhartu forseta Indónesíu. Ekki það að ég hafi haft dálæti á Suharto, en er ekki handbragðið hið sama, sem við þekkjum frá Gordon Bulldog Brown og ESB ?

Undan ESB-skrímslu getum við komist, með Myntráði og gjaldmiðili sem studdur er við US Dollar. Hér má lesa um útfærsluna: http://altice.blog.is/blog/altice/entry/731502/

[Einar Sigurbergur Arason, 10.12.2008 kl. 11:59]

Ég skemmti mér konunglega yfir þessari grein. Hafðu bestu þakkir.

[Sigurður Hrellir, 10.12.2008 kl. 13:00]

Þér finnst það greinilega við hæfi að grínast með orkusparnað og umhverfisvernd. Ísland er enn á byrjunarreit í þessum efnum. Hefur þú annars hugleitt það hvað Ísland gæti fengið í sinn hlut með aðildarsamningi við ESB? Af furðulegum ástæðum er alltaf einblínt á það sem tapast gæti.

[Haraldur Hansson, 10.12.2008 kl. 19:19]

Sæll Sigurður og takk fyrir innlitið.

Að spara orku og vernda umhverfið er göfugur málstaður. Þar sem rafmagn er dýrt og framleitt með mengandi orkugjöfum er þetta hið besta mál.

En þetta var samt fyndið - eins og hún sagði það - og alveg meinlaust að grínast með það.

Hvað Ísland "fengi í sinn hlut" er mjög á reiki ef evran er frátalin. Enda er hún takmarkið, fyrst og síðast. Umræðan er meira um hverju má til kosta; að ekki verði lagt í óásættanlegan fórnarkostnað. Lækkun tolla og aðgengi að ákvarðanatöku er líka talið til kosta, þó vægi Íslands í því síðarnefnda sé óverulegt.