Tökum bara 1262 á þetta!

Gamli sáttmáli 1262. Fyrir Nýja Ísland þarf Nýja sáttmála. Það gekk svo ljómandi vel í fyrra skiptið, tók ekki nema 682 ár að endurheimta sjálfsvirðinguna. Nú er hægt að játast undir Evrópu í hvelli, getum klárað dæmið á rúmum tveimur árum. Þá getum við haldið upp á 200 ára fæðingarafmæli Jóns Sigurðssonar á viðeigandi hátt.

Við þurfum að flýta okkur að taka upp evruna. Enda snýst umræðan um það og ekkert annað. Ef ekki löglega þá einhliða. Það á bara eftir að klára nokkur smámál, segja þeir. Sjávarútvegur, landbúnaður, skattar, orkumál og eitthvað fleira léttvægt. (ESB er ekki með 40 þúsund manns í vinnu við það eitt að föndra við evrur.)

Til að redda okkur út úr kreppunni, sem stendur yfir í augnablikinu, er ekkert betra en að ganga í Sambandsríkið Evrópu og vera agnarsmár partur af því næstu 682 árin.

Og nú má enginn tala um að fara sér hægt, það er eitthvað svo 2007. Svipað og að gagnrýna útþenslu bankanna. Það er hallærislegt, bara afturhaldsseggir gera svoleiðis. Og alls ekki hafa orð á því að ESB er ekki gjaldmiðill.

Allar nánari upplýsingar er að finna á island.esb

Lýsa yfir fullum stuðningi við formanninn

Athugasemdir

[Deddi (IP-tala skráð) 9.12.2008 kl. 15:10]

Rétt hjá þér Haddi.

Bara drífa í þessu! Tökum hraðleið sem segir sex án þess að velta fyrir okkur hverjir viðkomustaðir eru, hvað þá endastöð. Skjótum strax og spyrjum svo! Verum ekkert að velta upp neinum samningsmarkmiðum - það flækir bara málin - enda hefur enginn þorað að setja neitt slíkt fram af ótta við veikja samningsstöðuna. Þjóðinni kemur ekkert við um hvað á að semja í Brussel. Skítt með sjómenn, bændur og þann verkalýð sem missir vinnuna þegar við verðum orðin hluti af festunni frá Brussel. Fyrir öllu að við komumst í klúbbinn og dreypt á rauðvíni eða expresso með hinu evrópuliðinu. Það er fullt af liði sem fengi atvinnu við það!

[Haraldur Hansson, 9.12.2008 kl. 18:15]

Já, ekki átti ég von á athugasemd af þessu tagi frá flokksbundnum Samfylkingarmanni - svona í ljósi þess hvernig landið liggur.

En gott að vita að skynsemin eigi sér alls staðar rödd og menn vilji fara sér hæfilega hratt. Ekki bara setja í fluggír og ana af stað án þess að svo mikið sem biðja um leyfi fyrir flugtaki.

[Deddi (IP-tala skráð) 11.12.2008 kl. 15:07]

Sæll aftur ......

Sumir hafa styrk til að synda á móti straumnum!

kv

Deddi