ÍBV – KR ... og fiskveiðar

18. september mætast toppliðin KR og ÍBV í Pepsí-deild karla í Eyjum. Leikurinn gæti ráðið úrslitum um hvar titillinn lendir. Bæði liðin vilja auðvitað vinna. Hagsmunir þeirra eru, eðli máls samkvæmt, eins ólíkir og hugsast getur.

Ef stjórn knattspyrnudeildar KR tæki þá ákvörðun að fela Heimi þjálfara ÍBV að velja lið KR fyrir leikinn og treysta því að hann gætti hagsmuna KR-inga í hvívetna, fengi hún minna fylgi í Vesturbænum en glæsileg niðurstaða um Icesave.

Það væri jafn glórulaus ákvörðun og ef Íslendingar tækju upp á því að fela erlendum embættismönnum í Brussel formleg yfirráð yfir miðunum umhverfis Ísland og treysta því að þeir gættu hagsmuna Íslands í hvívetna. Hagsmunir Íslands og ESB eru nefnilega líka eins ólíkir og hugsast getur.

Hér er útgerð undirstöðugrein en í ESB gengur hún fyrir styrkjum, oft á félagslegum grunni. ESB flytur inn mikinn fisk en Ísland er stór fiskútflytjandi. Hér eru stór og gjöful fiskimið en ESB leitar logandi ljósi að nýjum miðum fyrir ofvaxinn flota sinn.

Það eru minni líkur á því að Ísland geti áfram rekið arðbæra útgerð til framtíðar innan ESB en að KR gefi leikinn í Eyjum.

Hugmyndin um inngöngu Íslands í ESB á ekki skilið meira fylgi en vondur Icesave samningur. Hún á í raun ekki skilið neitt fylgi. 0% væri alveg passlegt.

 

Athugasemdir

[Theódór Norðkvist, 6.9.2011 kl. 01:30]

Davíð Oddsson lét George W. Bush á sínum tíma draga sig á asnaeyrunum til að halda að hann (Davíð) væri stór karl af því að Bush hefði kallað hann vin sinn.

Þá sagði einhver að stórveldi ættu enga vini, aðeins hagsmuni. Það á við um ESB jafnt sem Bandaríkin og Kína.

[Haraldur Hansson, 6.9.2011 kl. 23:24]

Þakka innlitið og athugasemdina.

Það eru mikil sannindi í því að stórveldi eigi sér aðeins hagsmuni.

Barroso, forsætisráðherra ESB, elur með sér draum um heimsveldi. Sannkallað stórveldi. Hvaða hagsmuni ætli hann sjái í "vinskap" heimsveldis síns við Ísland?