Þingmaður sakar ráðherra um geðvillu

Það þarf að auka virðingu Alþingis. Um það virðast allir vera sammála, bæði formlegar nefndir, almenningur og ráðamenn. Á sama tíma og þetta er rætt birtir Þór Saari grein þar sem hann segir Steingrím J Sigfússon "illa haldinn af Hubris heilkenninu".

Þetta er ekki í fyrsta sinn sem þingmenn Hreyfingarinnar tjá sig um andlegt jafnvægi kolleganna. Þráinn Bertelsson gæti lesið tölvupóst frá fyrrum flokksfélaga um það.

Hubris heilkenni er brenglun eða "geðvilla", sem er íslenska orðið sem Birgitta Jónsdóttir, þingmaður Hreyfingarinnar notar um fyrirbærið (sjá hér #15). Geðvilla þessi stafar af (miklum eða skjótfengnum) völdum og lýsir sér m.a. í hroka, firringu og skorti á auðmýkt. Orðatiltækið dramb er falli næst á við um hinn veika, þar sem með ásökun um Hubris er jafnan gefið í skyn að fall eða refsing sé innan seilingar.    

Um fjármálaráðherrann segir Þór Saari:

Það sem blasir hins vegar við er að formaður VG er orðinn svo illa haldinn af "Hubris" heilkenninu að hann gerir ekki lengur greinarmun á réttu eða röngu og segir einfaldlega það sem honum persónulega hentar hverju sinni.

Þessa grein birti Þór Saari á a.m.k. fjórum stöðum; Smugunni, Svipunni og Tíðarandanum, auk bloggsíðu sinnar.

Niðrandi ummæli um nafngreint fólk eru of algeng í netheimum, sér í lagi í nafnlausum athugasemdum við blogg og fréttir. Það getur verið erfitt að eiga við það en það er aldeilis fráleitt að þingmaður svívirði ráðherra í greinarskrifum á netinu.

Það skiptir engu máli hversu ósammála Þór Saari er Steingrími J Sigfússyni eða hversu óánægður hann kann að vera með embættisfærslu hans, það réttlætir ekki opinberar ásakanir um geðvillu.

Ef það á að auka virðingu Alþingis þurfa þingmenn að byrja á sjálfum sér, bæði innan þings og utan. Að sýna fólki tilhlýðilega virðingu og viðhafa háttvísi og kurteisi, bæði í ræðustól og á öðrum vettvangi. Að bera geðvillu á ráðherra í skrifum á netinu eykur ekki virðingu fyrir þingmönnum eða þinginu og er óviðeigandi með öllu.

 

Athugasemdir

[Sigurður Þór Guðjónsson, 15.9.2010 kl. 01:49]

Geðvilla, hvort sem menn eru nú haldnir henni eða ekki, kemur geðheilsu ekkert við. Hún er ekki geðveiki heldur skapgerðareinkenni. 

[Dingli, 15.9.2010 kl. 05:12]

Sæll Haraldur

Ef ég á að segja eins og er þá veit ég ekki hvor ykkar er vitlausari þú eða Sigurður Þ. G.  GLÆPURINN var skipulagður!! Geðsjúkdómar kona málinu ekkert við!!!

[Svanur Gísli Þorkelsson, 15.9.2010 kl. 08:22]

Sæll Haraldur; Þú skrifar að allir virðist vera sammála, bæði formlegar nefndir, almenningur og ráðamenn, um að efla þurfi virðingu Alþingis. -

Hvernig í ósköpunum er það hægt?

Alþingi er fullt af atvinnupólitíkusum og pólitík er ekki heiðvirður bransi og getur aldrei orðið það á meðan flokkakerfið er við lýði. 

Þar tíðkast að ljúga og svíkja, sýnast góður og láta aðra sýnast verri.

 Meðal stjórnmálamanna ríkir metingur og þráhyggja, flokkadrættir og blind tryggð við flokkseigendafélögin. -

Alþingi sem samsett af slíku fólki á enga virðingu skilið.

[Haraldur Hansson, 15.9.2010 kl. 08:36]

Þakka ykkur innlitið og athugasemdirnar.

Inntakið er þetta: Í umræðum sem nú standa yfir á þingi er ítrekuð krafan um aukna virðingu Alþingis. Þá verða menn að byrja á að taka til hjá sjálfum sér og sýna gott fordæmi. Skrif af þessu tagi ríma ekki við það.

Í hvað hólfi Hubris heilkennið á heima er ekki aðalatriðið. Það er verið að saka ráðherrann um brenglun sem geri hann ófæran um að gera greinarmun á réttu og röngu.

Það er rétt athugað hjá Sigurði og Dingli að orðanotkun í síðustu málsgreininni er ekki rétt og mun ég leiðrétta það. Þakka ábendinguna.

[Jakobína Ingunn Ólafsdóttir, 15.9.2010 kl. 10:54]

Sæll Haraldur

Ég held að flestir sem sjá þetta hugtak tengi það ekki við geðveiki eða heilsufar. þetta á fremur um breytingu sem verður á hugarfari manna við tilteknar aðstæður.

Steingrímur J Sigfússon er opinber persóna og öll umfjöllun og greining á embættisfærsum hans er réttmæt hvort svo sem fólk er henni sammála eða ekki. Ef greiningin er vond eða ónákvæm þá fellir það skugga á höfund greiningarinnar. Það er því mikilvægt fyrir fólk að vanda sig við greiningu ef það vill ekki skjóta sjálft sig í fótinn.

Eftir hrun var hið viðtekna hjá sökudólgum að ekki skyldi persónugera bankahrunið.

Ég er alfarið þeirrar skoðunar að skelfilegt umfang bankahrunsins var af mannavöldum og þeir sem fóru með forystuna séu persónulega ábyrgir.

Ráðherrar bæði fyrir og eftir hrun eru illa haldnir af Hubris.

Það birtist meðal annars í því að þeir tala til þjóarinnar eins og þjóðin sé firrt allri dómgreind.

[Valdimar Samúelsson, 15.9.2010 kl. 12:35]

Er þá ekki bara spurningin flokkast ekki geðveikt fólk með einhverskonar mikilmensku á Alþingi. Það er sagt um 'góða' rithöfunda að þeir séu með geðveilu sem keyrir þá áfram. Kannski þurfa menn að vera geðveikir til þess eina að sækjast í að vinna þarna en þá eru þeir í réttu umhverfi.

[Haraldur Hansson, 15.9.2010 kl. 12:41]

Svanur Gísli telur upp einmitt það sem þyrfti að færa til betri vegar til að auka virðingu Alþingis, hvort sem það er raunhæft eða ekki.

Jakobína, ég held að margir þekki ekki hugtakið. En þegar það er sett fram í samhenginu "illa haldinn af Hubris heilkenninu" felst í því umsögn sem er óviðeigandi af hálfu þingmanns að setja á prent um annan þingmann/ráðherra.  

[Haraldur Hansson, 15.9.2010 kl. 12:45]

Valdimar, ekki skal ég leggja dóm á þessar vangaveltur þínar. Færslan er um að sitjandi þingmenn verði að sýna af sér háttvísi og almenna kurteisi ef virðing Alþingis á að aukast.   

[Óskar Helgi Helgason (IP-tala skráð) 15.9.2010 kl. 15:08]

Heill og sæll Haraldur - sem og gestir þínir, aðrir !

97 - 98% Alþingis seta; er annálaður úrhrakslýður, og ber því ENGIN virðing.

Reyndu; að fá þetta úrkast íslenzks samfélags, sem þorri þingsetanna er, til þess að líta upp úr MAFÍU grenjum sínum, sjáum svo til, hvort einhver ''virðing'' hlotnist þeim, þaðan í frá, Haraldur minn.

Fyrr ekki !

Með beztu kveðjum; sem jafnan /

Óskar Helgi

[Viggó Jörgensson, 15.9.2010 kl. 21:17]

Í gamla daga kunni maður bara vel við Steingrím.  

Framkoma hans, orð og gerðir eru hins vegar orðið verulegt áhyggjuefni. 

Það bendir margt til þess að hann sé orðinn geggjaður og hættulegur. 

Hann gerir ekki mun á réttu og röngu.

Ekki á sannleika og lýgi. 

Vilji þjóðarinnar skiptir hann engu máli. 

Hann er í heilagri krossferð, þar sem hann ákveður tilganginn sjálfur. 

Málstaðurinn er svo göfugur að vaða má yfir allt og alla. 

Guði sé lof að hann hefur ekki menn undir vopnum.  

[Guðmundur Guðbjarnarson, 15.9.2010 kl. 21:51]

Þó að Þór sé lágvaxinn maður, þá er það ekkert á við andleg atgervi hans.

[Eyjólfur G Svavarsson, 15.9.2010 kl. 22:47]

Viggó! það er málið Hann einn hefur alltaf rétt fyrir sér, en engin annar. það er  orðið svo ergilegt að hlusta á hann að maður fer niður á núllið á augabragði ég held að Þór Saari hafi rétt fyrir sér, svei mér þá

[Haraldur Hansson, 15.9.2010 kl. 23:51]

Þakka ykkur athugasemdirnar.

Óskar Helgi; heldur þykir mér rýrt, að þú finnir aðeins hálfa sál, ærlega, í hverri tylft þingseta, og þá aðeins tvo drengi góða, í þingheimi öllum. Betur má, ef duga skal.

Viggó, Guðmundur og Eyjólfur gera hér allir athugasemdir sem við, óbreyttir borgarar, getum kannski leyft okkur. Tilefni færslunnar er umræðan um að endurreisa virðingu alþingis, sem þýðir að þingmenn ættu ekki að leyfa sér þannig athugasemdir um aðra þingmenn, ekki frekar en innantómt málþóf eða málæfingar og hnútukast í ræðustóli.

[Óskar Helgi Helgason (IP-tala skráð) 16.9.2010 kl. 00:04]

Komið þið sæl; að nýju !

Haraldur !

Ég hygg; að ekki muni ég nærri komast, í útreikningum mínum, um stund; þér, að segja, ágæti drengur.

Með; þeim sömu kveðjum, sem fyrri /

Óskar Helgi

[Sigurgeir Orri Sigurgeirsson, 17.9.2010 kl. 07:41]

Hubris er dramb og á prýðilega við um stjórnmálamenn sem hafa misst jarðsamband og farið fram úr sjálfum sér. Það er sjálfsagt að nota það orð. Mér sýnist það eiga vel við þennan tiltekna stjórnmálamann.

[Elle_, 19.9.2010 kl. 14:10]

Hegðun Steingríms síðan hans komst til valda er vægast sagt löngu orðin ógnvekjandi og skelfileg og ég held hann, Jóhanna og Össur séu hættulegir stjórnmálamenn.  Segi eins og Viggó að ofan: Guði sé lof að hann hefur ekki menn undir vopnum.