Íslendingar neita að mæta í eigin jarðarför

Einar Már Guðmundsson rithöfundur skrifar mjög áhugaverða grein í Sunnudags Moggann, þar sem hann fjallar um sögu Haítí. Ekki um hinn hörmulega jarðskjálfta 12. janúar, heldur þá gildru fátæktar og örbirgðar sem haítíska þjóðin hefur verið föst í um aldir.

Einar Már rekur sjálfstæðisbaráttu Haítí frá 1697 til 1804 og þá efnahagslegu kúgun sem þjóðin sætti til 1947. Það sem síðan fylgdi í kjölfarið allt þar til Aristide var kosinn til valda í lýðræðislegum kosningum með 67% fylgi. Í greininni fjallar hann einnig um aðkomu AGS og hvernig sjóðurinn hefur notað skuldsetningu sem tæki til einkavæðingar, lækkunar launa og niðurskurðar.

Ég mæli eindregið með að menn líti í Sunnudags Moggann og lesi greinina alla. AGS, sem leikur stórt hlutverk hér á landi núna, kemur mikið við sögu í greininni og IceSave á líka sitt pláss. Fyrirsögnin er fengin úr greininni, þar sem vísað er í synjun forseta á IceSave lögum. 

----- ----- -----

Hér eru nokkrar tilvitnanir í greinina (feitletranir mínar):

Fjármálaheimurinn er fullur af skuldunautum og lánardrottnum eins og í faðirvorinu.

Ekki fyrir löngu barst mér grein úr afrísku blaði þar sem fyrirsögnin er þessi: Íslendingar neita að mæta í eigin jarðarför.

Umbótaviljanum eru takmörk sett og þessi takmörk helgast af skuldsetningunni. En Aristide sagði: "Það er betra að hafa rangt fyrir sér með þjóðinni en rétt fyrir sér gegn þjóðinni."

Kmart og Walt Disney borga 11 sent á tímann fyrir að sauma náttföt og stuttermaboli og stór fyrirtæki sem koma til landsins njóta undanþágu frá sköttum í allt að fimmtán ár.

Ég heyrði þann ágæta mann Þorvald Gylfason líkja Alþjóðagjaldeyrissjóðnum við flugbjörgunarsveit. Hljómar það ekki eins og að líkja mafíunni við mæðrastyrksnefnd?

Margt bendir til að fulltrúar Alþjóðagjaldeyrissjóðsins líti á landið (Ísland) einungis sem reikningsdæmi ... hvernig snúa mætti skuldastöðunni við með afkastamikilli framleiðslu og gjörnýtingu orkulinda samfara niðurskurði opinberra útgjalda og hækkun skatta. Hið félagslega fjöregg þjóðarinnar, velferðarkerfið, er að veði.

 

„Algjörlega út í hött“

Athugasemdir

[Doddi D (IP-tala skráð) 24.1.2010 kl. 23:53]

Er ekki rétt að fara fram á að Frakkar skili þessum blóðpeningum og endurgreiði Haiti þennan samning?

[Haraldur Hansson, 25.1.2010 kl. 00:30]

Þakka inniltið Doddi.

Kannski má stilla dæminu svona upp: Frakkar skili Haítí kúgunarfénu, Spánverjar, Hollendingar og Portúgalar geri upp arðrán í nýlendum sínum, Bretar bæti Indlandi allan skaðann o.s.frv.  Svo, þegar þessi fínu fordæmi eru komin, skulum við tala um þetta IceSave dæmi, þó það séu smámunir í samanburðinum.  

[Jón Valur Jensson, 25.1.2010 kl. 02:04]

Nei, Haraldur, við bíðum ekkert með að tala um þetta nýjasta svikadæmi, Icesave-málið – og sannarlega bíður ÞÚ ekkert með það, veit ég! Við ætlum ekki að taka við okinu og fá því aflétt (og rangindin leiðrétt) einhvern tímann eftir að Bretar, Frakkar, Belgir, Hollendingar, Spánverjar, Portúgalar, Þjóðverjar og Ítalir hafa bætt nýlendum sínum allan skaðann, enda verður það seint eða aldrei. Hins vegar er þetta alveg rétt krafa, sem Doddi setti þarna fram og þú tókst undir. Sbr. líka Morgunblaðsgreinina frábæru hans Gunnars Skúla Ármannssonar læknis (hér opin á bloggi hans): Ísland, Icesave og Haítí; er réttlæti mögulegt?

Með góðri kveðju,

[Einar Björn Bjarnason, 25.1.2010 kl. 13:59]

Mjög áhugaverður samanburður - "Ekki/Aldrei Haiti norðursins" - gæti verið slagorð.

Kv.